Mga paagi alang sa maayong pagdumala nga kabataan

1. Pagtahud. Tudloi ang imong anak nga motahud ni bisan kinsa ug sa bisan asa. Kay kun wala ang pagtahud, malisud alang sa imong anak ang pagsabot sa kahulogan ug kamahinungdanon sa disiplina.

2. Limitasyon- Pagtudlo sa kabataan nga dili diay nila mahimong makuha ang tanan. Sa laing bahin, kini nagpasabot usab nga adunay seguridad diha sa limitasyon nga dili nato makuha diha sa mapasagarong pagkinabuhi. Ang malipayong panimalay dili nato masinati diha sa pagpasagad lamang. Ang malipayong panimalay anaay limitasyon.

3. Pagkamasinugtanon kuyog ang Rason

Tudloan ang bata nga mamahimong masinugtanon apan sa laing bahin, tudloan usab siya sa rason kun nganong kinahanglang motuman siya o dili sa maong sugo o mando. Paagi kini aron matudloan ang bata nga mohimo og mga pagtimbang-timbang sa mga panghitabo sa iyang kinabuhi ug sa iyang palibot. Tabang kini aron ang bata makaamgo sa hinungdan kun nganong siya nasilotan gumikan sa iyang binuhatan.

4. Kausa ray Sulti uban ang Paglihok-Ang bata makaamgo kun ngano ang iyang inahan ang mopahamtang og disiplina nga walay daghang sulti. “Daghang sulti, daghang sayop!” sama pananglit kun ang imong bata nagduwa unya mokalit og kitkit sa iyang duwaan nga plastic, imbis imo siyang kasab-an, imo hinuon siyang bawian sa iyang duwaan. Sa madugay ug sa madali, hisabtan niya kun nganong gibawian siya sa duwaan. -- Sumpayan pa