Gihimong basurahan ang BOC

Mokabat sa 236 ka mga motorsiklo ang nagtapok karon sa gawas nga bahin sa opisina sa polis sa Bureau of Customs. Halos tanan sa motorsiklo mga gubaon. Ang maong mga motorsiklo gipanag-iya sa Pilipino Rural Bank sa Dumaguete, Talibon, ug Tagbilaran City sa Bohol, Philippine Countryside Rural Bank ug Bank of East Asia sa dakbayan sa Mandaue, Rural Bank of Bais sa Bais City, Negros Oriental.

Ang mga motorsiklo gisakmit nunot sa kamandoan sa buhatan  ni Customs Commissioner Ruffy Biazon nga gipagawas kaniadtong Marso 18 ning tuiga tungod sa kapakyas sa nahisgotang mga bangko pagpakita og mga ebidensiya nga nabayran ang Customs duties ug buhis sa gipanghuptan nilang mga motorsiklo.

Dako og posibilidad nga ang mga motorsiklo inimbargo sa mga bangko gikan sa ilang mga kliyente nga wala makabayad sa ilang pautang.

Kay walay mapakitang ebidensiya nga nagpamatuod nga nabayran ang buhis sa pagpasulod sa nahisgotang mga motorsiklo gikan sa gawas sa nasud, atong masabot nga ang mga motorsiklo nga nagtapok karon sa gawas nga bahin sa buhatan sa Customs polis mga pinalusot. Kinsa man kaha ang nagpalusot sa maong mga motorsiklo? Dili ta makaseguro sa tubag kun ang responsable ang karon ba o ang bag-ong namuno karon sa Bureau of Customs. Ang ato ra nga maseguro nga taga Customs gayod ang mitugot niini sa pagpalusot.

Dinhi atong makita nga gikingkoy sa mga smuggler ang mga taga Bureau of Customs ug ang atong gobyerno. Gawas nga wala siya bayari og buhis, gihimo pa gayod nga basurahan sa mga smuggler ang iyang buhatan. Kay ngano man? Una, wala mobayad og buhis sa gobyerno ang mga smuggler sa ilang mga kinompra nga motorsiklo didto sa gawas sa nasud. Pero, dili gyod hingpit nga wala silay nabayran sa pag-abot sa ilang mga kinompra kay mibayad man sila sa mga bag-angang buaya sa Bureau of Customs aron makalusot ni nila. Human makalusot ug nakasulod sa merkado, nabalik ra gihapon kini sa Bureau of Customs para pabayron og buhis. Pero ang nabalik dili na mapahimuslan kay mga gubaon na. Sa laktod nga pagkasulti ang mibalik mga basura na.  Sa Bureau of Customs ang mga kinompra sa gawas nga dili mabayran ang buhis konpiskahon ug iyang ibaligya aron makasapi ang gobyerno, pero, unsa bay masapi ani sa gobyerno nga basura man ning anaa karon sa ilang atubangan.

Unsa bay ikasulti sa District Commander sa Customs Police nga si Maj. Camilo P. Cascolan, Jr. sa paghimong basurahan sa gawas nga bahin sa iyang buhatan? Ah, busy kuno siya sa dihang ato siyang gibisita.