Demalas ni Carillo

Nganong hadlok man kaayo ang Ombudsman nga mo-imbestigar ni Konsehal Gerry Carillo nunot niadtong iyang pagpamukpok og bato sa usa ka inosenteng 16-anyos nga batang lalaki sa Kuerk’s bar nga giingong gi-manage sa uyab-uyab sa opisyal?

Kun paminawon nimo si Deputy Ombudsman for the Visayas Pelagio Apostol, klaro man kaayong hadlok siya nga mohilabot sa kaso.  Daghan kaayong mga kaso nga naabot diha sa Ombudsman nga walay labot sa trabaho sa usa ka opisyal, apan nanghilabot man ang Ombudsman. Sama pananglit niadtong kaso ni Abines nga nakapusil sa buwangan, gi-imbestigar man kadto sa Ombudsman.

Bisan hinuon og dili manghilabot ang Ombudsman, seguro ko nga maglabad gyud ang ulo niining Carillo tungod sa kadaghan sa mga batan-on nga nakasaksi sa iyang pagpukpok og bato sa 16-anyos nga taga-Ermita.

Bisan unsaon sa pagpangugat sa iyang abogado nga dili si Carillo ang nakasamad sa ulo sa bata, daghan ang mga testigos nga andam mobarog nga si Carillo ang namukpok atol sa kagubot.

Mosamot kalabad ang ulo ni Carillo niining higayona nga ang bata mismo ang moluwat og affidavit pagtudlo sa konsehal nga maoy namukpok og bato sa iyang ulo. Mao kini gitawag og “positive identification” sa biktima mismo.

* * *

Kining ngalan nga Kuerk’s bar gipanag-iya diay kini kanhi sa  mga Aznar. Apan nabaligya na ngadto sa laing tawo ang luna, busa dili na unta angay gamiton ang maong ngalan.

Apan nganong gigamit man kining maong ngalan nianang bar diin hapit matag adlaw anaa magyampungad si Carillo?

Kun dili kini iya, nganong anaa man siya pirme diha?

Nalilian hinuon nga walay bayadbayad og buhis ang maong restobar mao nga angay gyud kining sirad-an sa dakbayan. Gawas pa, duol kaayo kini sa University of San Carlos College of Law, apan dugaydugay kining nag-operate bisan nakalapas sa anti-noise ordinance.

* * *

Unsa kahay mahimo sa Konseho niining nahitabo ni Carillo?

Wala lang ba silay imbestigasyon aron sila mismo mopahamtang og silot sa ilang kauban nga nagpakita sa iyang kamaldito taliwala sa publiko?

Tan-awon nato unsay aksiyon sa Konseho sa siyudad sa Sugbo nga mayoriya mga kauban ni Carillo sa Bando Osmeña Pundok Kauswagan (BOPK).