Ang PDAF ni Noy Pabling!

Sa atong pagsuwat ini, waa pa ko’y kasayoran unsay naabot nga desisyon bahin sa kang Congressman Pablo Garcia nga PDAF. Kun akoy pabut-on, ako nang iapod-apod ngadto sa intended nga mga beneficiaries, pinasikad sa talaan ni Noy Pabling.

Bisan tuod og dili na siya Kongresista, apan, alang nako, tahuron gihapon nato ang iyang kagustoan. Dili maayong ibalik ngadto sa Kongreso. Anugon. Mo-appear nga nasuko siya nganong waa siya sublii, ug nganong si Davide ang gipadaug pagka-gobernador, dili si PJ.

In the first place, nganong waa man ni niya ipanghatag dayon – nganong iya pa mang gipundo sa  Kapitolyo … aron ingnon daghan og kwarta ang Kapitol, ug waa gyuy utang?

Anyway, whatever, dili maayong ibalik sa Kongreso.

* * *

Ang  Random Manual Audit Committee (RMAC) mitaho nga 99.97% accurate ang resulta sa miaging eleksyon. Kun mao, waa nay kapuslanan ang mga protesta sa miaging eleksyon. Matud ni Comelec Chairman Sixto Brillantes, dili man perfect ang resulta, but at least, accurate.

Ang RMAC gilangkoban sa Comelec mismo, Parish Pastoral Council for Responsible Voting (PPCRV), ug sa National Statistics Office (NSO).

Ang pag-audit milungtad og  43 ka adlaw, naglambigit og 1,522 ka tawo, lakip sa 330 ka personnel sa Comelec, 1,170 ka magtutudlo gikan sa DepEd, 21 ka empleyado sa NSO,  ug usa gikan sa PPCRV. Nganong usa ra man?

Kun katuhoan man ang ilang report, nan, ato nang wagtangon ang kabalaka nga ang resulta sa miaging automated election kadudahan ug dili kasaligan. Unless duna gyud kay lig-on ug kasaligan usab nga mga ebidensiya pag-support sa imong mga pagduda.

* * *

Sige sila’g hisgut og Cha-cha, despite sa baruganan ni Noynoy batok niini.  Apan, bahin ra man sa mga economic restrictions ang gihisgutan. Okay man ni. Apan, alang nako, daku kaayog usbunon ang  Cory Constitution.

Lagmit, mao kini ang hinungdan ngano nga di buot mo-tinker si Noynoy sa Constitution. Kay di siya buot mo-usab sa Constitution sa iyang inahan.

Mao ba? Di sad tingali uy! Sa ato nang gibalikbalik dinhi, makadaghan na ta mag-ilis-ilis  og presidente … apan, ang atong nasud, waa gyud mouswag. Nagpasabot nga dili tawo ang hinungdan, kundili, ang sistima. Sumaa, tapus sa Edsa revolution, nagtuo kita nga matarong ug magmalambuon na kining atong nasud.

Mahimo nga magmalampuson si Noynoy sa iyang matuwid na daan (in three years time), apan, after him, unsa man?

Alang nako, the Presidential-Federal System, maoy kasulbaran sa atong kalisud karon. Apan, dili sila ganahan ini, kay tingali’g ma-waa ang pork barrel. Bida sad uy!