Abtik apan dili alisto

Walay tawo nga dili abtik kay gibuhat man kita sa kahitas-an nga himsog ang lawas ug utok. Kun ugaling may binuhat kitang nakita nga luyahon, timailhan kana nga nahubsan na siya sa kusog. Ang gahum sa iyang kaabtik inanay nawala kay permi man gipildi sa dumog o pakigbisog ning kinabuhia. Gipaundayonan na lang ang kutob sa mahimo. Ingon sa gikapoy na nga mosalmot pa sa pamasin.

Unsaon nga ang gisandigan niya sa pagdaug mao ang sobrang pagsalig sa kaabtik sa kaugalingon. Makakita gani og oportunidad mo-arangkada dayon nga way pagsusi kun kini makahatag ba kaniya og paglaum. Kay ang anaa sa iyang hunahuna mao man nga di siya gusto nga maawahing malabwan sa pamentaha. Kini ang mga hinungdan nga luyo sa paningkamot maoy maani ang kapildihan.

Aduna say uban abtik apan dili alisto, magpatara ug mosugot lag mapildi kay kompyansa nga makabangon tungod sa kabatan-on nga may kaabtik pa. Apan mokilab lang ang panahon nga dili damhong wa nay purohan nga makahimo pa tungod sa kaluyahon. Giusikan ang kaabtik. Nawa sab ang birtud sa kaalisto, nga maoy depensa nga mohashas ug mopakgang sa ikadaut sa pangandoy.

Hinoon ayaw pakawa sa paglaum. Kay may kahayag pang nahibilin sa atong kinabuhi. Makita pa ang situwasyon nga pun-anan diin kita nagkulang. Palig-ona ang kahuyang nga bag-ohon ang diskarte sa pakigbisog. Pag-amping nga di ka matukob sa lit-ag aron ihunlak ka sa kangitngit. Itakin ang suga sa katarung nga maoy mobanwag ug mogiya sa paglihok, bisan sa kaapiki molampos gayud kita.

Basta una ka modisisyon, paghimo og pakisusi nga masuhito ka sa tunob nga imong subayon. Himoa ang plano nga sa imong paglakang may timailhan ka sa unahan nga dili mahitipas sa buot mong padulngan. Sagad ra ba kompiyansa na kaayo kun anaa na sa iyang palad ang bulawan… natagak pa sa lapok ug nawa ang kilatis sa iyang kabililhon. Igo na lang gihapuhap ang tumang kahinugon.

Ang mga sitwasyon nga atong gihulagway, magsilbi kining pahinumdom o salamin nga atong aninawon pag-ayo kun unsay tukma ug angay tang buhaton. Aron dili masugamak sa kadanghag sa pagtimon sa panlimbasog nga misangpot na hinuon sa hilabihang kawad-on. Halos mahayon pa ang kahitas-an sa iyang nahiaguman , nga gihatag man unta ang tanang kahigayonan aron kapuslan.