Walay budget ang CIPC, kaluoy baya!

Ang business process outsourcing (BPO) ug ang information and communication technology nakatabang kaayo og dako sa ekonomiya sa Central Visayas. Kining mga klaseha sa negosyo, apil na ang turismo, ang nakadala og P22 bilyones (US$516 milyones) nganhi sa rehiyon, sumala pa sa report sa Regional Development Council (RDC) sa Central Visayas niadtong miaging tuig 2012.

Ingon niini ang dagan sa call centers ug internet tungod sa paninguha sa mga ahensiya sa kagamhanan nga mosulbong kining mga negosyoha dinhi sa Kabisay-an. Usa sa mitabang niini mao ang Cebu Investments and Promotion Center (CIPC) sa dakbayan sa Sugbo.

Ang CIPC ubos sa pagdumala ni Joel Mari Yu ang gitahasan sa pag-promoter sa siyudad sa Sugbo isip nindot nga kabubo-an og puhonan alang sa BPO ug ICT. Pero daghan ang naguol karon nga wala butangi og budget ni Mayor Michael Rama ang CIPC.

Unsa kahay mahimo sa CIPC karon nga wala kini magamit nga pundo alang sa mga kalihukan ug programa niini pag-imbitar sa investors aron mobubo og puhonan dinhi sa Sugbo?

Maayo segurong masayod si Mike nga ang sobrang pamolitika usahay makadaot sa iyang programa.

Kun seryoso siyang mo-tap sa mga tawo nga motabang pagpalambo sa Sugbo, angayan niyang isalikway ang politika ug makigtrabaho siya bisan dili niya alyado alang, ug sa ngalan, sa Sugbo.

Kini man gud si Yu nailhan nga alyado ni kanhi Kongresista Tomas Osmeña nga kaatbang ni Mike sa politika.

Tan-awon nato unsay dangatan sa kampanya sa CIPC karon nga wala kini hatagi og gibug-aton ni Mike.

* * *

Seryoso nga report kining gitug-an ni outgoing PRO-7 director Marcelo Garbo nga si vice governor Agnes Magpale aduna diay hulga sa iyang kinabuhi sa wala pa kadtong Mayo 13 nga eleksiyon.

Nanglimbawot akong balhibo samtang nagbasa sa balita nga sa kantidad nga P500,000, ang kinabuhi ni Magpale giplanohan nga kutloon 15 ka adlaw sa dili pa ang eleksiyon.

Sumala pa ni Garbo nga mao kini ang hinungdan nganong ilang gibutangan og daghang police detail si Magpale.

Kaluoy sa Ginoo, walay nahitabong dautan sa bise gobernadora nga niadtong higayon nahimong acting governor tungod sa pagkasuspenso ni kanhi Gob. Gwendolyn Garcia niadtong Disyembre 2012.

Kakuyaw kun mao na kini ang kultura sa politika sa Sugbo – magpinatyanay lang tungod sa gahum.

Kinsa kaha ang atong pasanginlan niini?