Si Alex sa Bureau of Customs

Sige na ang kausaban sa Bureau of Customs nga gipangulohan ni Customs Commissioner Ruffy Biazon kinsa nagpabilin bisan pa man sa mga huhungihong nga paghulip kaniya. Uban sa kausaban nga gipatuman sa nahisgotang buhatan mao ang paglahogay sa iyang mga opisyal. Kining tanan giingon nga gitumong aron malimpyohan gayod ang buhatan gikan sa mga badlungon ug korakot nga mga opisyal.

Apan luyo niining tanan usa ka makapahingangha nga kasayoran ang akong nadawat. Ang maong kasayoran naghisgot sa pangalan sa usa ka tawo nga gikahadlokan sa mga players ug giilang mas gamhanan pa kay sa mga opisyal sa Bureau of Customs. Siya si Alex. Kinsa man kini siya?

Sigun sa akong kasayoran nga nadawat si Alex dili empleyado o opisyal man lang sa Bureau of Customs apan giilang gamhanan ug gikahadlokan sa mga players sa nahisgotang buhatan. Sa usa lang ka pagmando ni Alex mapagawas na niini ang mga kontrabando nga gipugngan sa Bureau of Customs.

Si Alex mitagsa-tagsa pagpatawag sa mga players sa Bureau of Customs ug mipaila sa iyang pagkagamhanan. Sa una, wala siya tuohi sa mga players kay lagi usa lamang siya ka civilian ug dili konektado sa Bureau of Customs apan dihang iyang gipamatud-an ang iyang pagkagamhanan pinaagi sa pagpagawas sa kontrabando nga gipugngan sa Bureau of Customs sa Davao pinaagi sa usa lamang ka pagtawag niini ug diha-diha dayon gibuhian ang kontrabando, sila mituo na kaniya. Si Alex giingong tawo ni Customs Commissioner Ruffy Biazon.

Laing kamatuoran nga gipakita ni Alex kun unsa siya ka gamhanan mao ang pagkabotang sa usa ka dakong opisyal sa Bureau of Customs sa Port of Cebu sa "Water Lily nga status o floating status" tungod sa pagsuway sa unang kamandoan mahitungod sa pagpalusot sa usa ka libo kapin ka mga container vans nga kontrabando.

Sigun sa akong nasayran ang maong mga kontrabando makalusot gyod unta nga walay kasayoran ang publiko kun gituman pa ang petsa ug adlaw ( Abril 16, 2013 ) sa pagpalusot niini sigun sa pagtugot ni Alex apan giingong mihangyo ang mga players nga aduna pa silay laing kontrabandong moabot sa laing adlaw ( Abril 23, 2013 ). Giingong mihatag sa iyang pagtugot si Alex sa hangyo sa mga players. Apan ang mga players nahimong suwapang ug miingon nga aduna pa silay laing dugang kontrabando nga moabot ug kini sigun sa pagtugot sa dakong opisyal sa Bureau of Customs. Tungod sa kalagot ni Alex ang tanang kontrabando apil ang iyang gitugotan nga makalusot gipaalerto ug gipahigtan sa dihang miabot sa port of Cebu. Ingon ani kagamhanan si Alex nga nakapakurog sa mga players sa Bureau of Customs.

Karon ang akong pangutana, tininuod ba ang kampanya ni Customs Commissioner Ruffy Biazon batok sa mga kawani ug opisyal sa Bureau of Customs nga mga badlungon o ang iyang gihimo mao lamang ang pagwagtang niadtong mga opisyal ug kawani nga dili iyaha?

Ang tumong ug tuyo ni Customs Commissioner Ruffy Biazon nga paglahugay sa mga opisyal sa Bureau of Customs mao ba gayod ang pagwagtang niadtong mga korakot o aron lang masolo niya ang pagpangurakot? Pangutana lang ning ako Mr. Commissioner. Sa laing bahin, unsa may inyong sabot niining Alex? Siya ba ang imong anino nga maoy motabon kanimo kun ugaling magkabolilyaso ang inyong mga plano? Lain gihapon ni nakong pangotana.