Utang sa Kapitolyo
Nabisto ang panghambog ni kanhi gobernador Gwen Garcia nga iyang ibilin ang probinsiya ngadto ni Gobernador Hilario Davide III nga adunahan ug way bisan usa ka dako nga utang.
Kini tungod nga nadiskobrehan ni Davide nga miabot diay og dul-an sa usa ka bilyon ka pisos ang bayranan sa lalawigan ngadto sa mga suppliers niini.
Sigun sa report sa Provincial Treasurer's Office nga mikabat og P788 milyones ang gibiling bayranan ni Garcia.
Sukwahi ni sa iyang gipanghambog atol sa turnover ceremony tali niya ug ni Davide duha ka adlaw sa wala pa mapupos ang iyang termino niadtong Hunyo 30.
Si Davide miingon nga samtang tinuod way utang ang lalawigan sa mga financial institutions apan ang mga payables niini sa mga suppliers maisip gihapon nga utang nga angayang bayran.
Wala kinahanglana nga ang financial institutions maoy maningil aron maisip nga utang.
Ang pagkuha sa serbisyo o supply nga dili bayran maisip gihapon kini nga utang.
Sama ra gud og mopalit ka og asin sa tindahan nga dili nimo bayaran ilista kini sa tindira nga imong utang.
Ang mahinungdanon nga isyu dinhi mao, duna bay igong pundo ang probinsiya nga magamit aron ibayad sa maong utang?
Sigun sa report sa treasurer's office, dunay kwarta ang probinsiya sa bangko nga mokapin sab og P700 milyones. Kuwang ni og dyutay ibayad sa tanang obligasyon sa probinsiya.
Sa laktud nga pagkasulti maisip nga zero balance ang panudlanan sa lalawigan atol sa pagbanos ni Davide.
Posible hinuon nga dili ang tanang utang ang mabayran tungod kay dakong bahin niini giingon nga way klarong dokumento nga ikasuporta.
Usa sa importante nga dokumento nga gipangyo sa bag-ong administrasyon mao ang covering resolution gikan sa hunta probinsiyal.
Kun way approval sa board posible nga di gyud kini mabayran. Leksyon ni sa mga supplier sa gobyerno nga di sad magpataka og supply kun di sigurado nga dunay pagtugot sa konseho o sa board.
* * *
- Latest
