Mga saad ni Davide

Limpiyo ug tinud-anay nga pagdumala ang gisaad ni Gobernador Hilario “Junjun” Davide III sa iyang pagkupot karon sa renda sa pangagamhanan sa Kapitolyo. Morag palabtitk kini sa nangaging administrasyon sa probinsiya.

Kahinumdoman nga naputos sa anomaliya ang pamunoan kaniadto ni kanhi gobernadora Gwendolyn Garcia. Lakip na niini ang giingong kwestiyonable nga pagkatukod sa Cebu International Convention Center ug ang pagpalit sa Balili property didto sa Barangay Tinaan sa dakbayan sa Naga.

Gani nag-atubang karon og kaso si Garcia, kinsa usa na karon ka kongresista, sa Sandiganbayan. Kini human madiskitahan ang anomaliya sa transaksiyon sa Balili, basi usab sa imbestigasyon sa Ombudsman.    

 Gustong iliko ni Davide ang panan-aw karon sa mga Sugboanon sa nagkagusbat nga imahe sa Kapitolyo ngadto sa tarong ug ligdong nga pamalakad sa probinsiya.

Matuman kaha kini ni Davide?  Hinuon wala pay usa nga nasayod. Ug kun matuman man, angay lamang siyang pasidunggan. Og kun dili, nan angay nato siyang labhan tungod sa mga saad nga wala matuman.

Hinuon, sa atong nakita, ligdong ang pagkatawo ni Davide. Sa iyang pipila ka tuig sa serbisyo publiko, ilabina sa iyang pagkakonsehal sa dakbayan sa Sugbo, wala ko makadungog og mga anomaliya nga iyang nalambigitan.

Ug nagpasabot lamang kini nga seryoso gayud ang bag-ong gobernador sa iyang krusada alang sa limpiyo nga pamunoan sa lalawigan. Ug kini matuman lamang kun mosuporta usab ang tanang opisyal ug kawani sa Kapitolyo, sa mga kalungsoran ug siyudad sa probinsiya.

Hinuon dako kining sagubangon ni Davide. Kini gumikan usab kay buak pa ang lalawigan kun pulitika na gani ang hisgotan. Adunay mga lideres sa probinsiya nga anaa ilalum sa laing partido ug nga adunay mga politikanhong interes.

Busa angay himoong prayoridad ni Gobernador Davide ang kahiusahan sa mga lider ug katawhan sa lalawigan. Kini aron makab-ot niya ang katumanan sa iyang mga plano alang sa kauswagan sa Sugbo.