Networking

Kini ang kasagaran natong madungog diha sa nagkadaiyang natad gikan sa negosyo hangtud na sa kalibutan sa internet. Anaa ang Facebook diin atong mapaambit ang atong mga pagbati ug gihunahuna ngadto sa atong mga higala.  Kining maong pamaagi ang gihimo usab ni Jesus sa iyang kapanahonan. Gawas sa napulog-duha ka mga tinun-an iyang gisugo ang laing kapitoag duha aron mamahimong mas mapadali pa ang pagsangyaw sa Gingharian ngadto sa mga kasikbit nga mga dapit.

Anaa kang Jesus ang mindset sa usa ka leader nga mao ang pagpalapad sa impluwensiya pinaagi sa mga kasaligang tawo. Mga tawo nga miambit sa mao rang panghunahuna ug tinguha. Kini ang sekreto alang sa pagkab-ot og kalamboan sa bisan unsang programa. Mao nga kini ang hagit sa matag usa kanato nga ania karon.

Maantigo kitang moduol sa mga tawo nga makapalambo sa atong kawsa ug maantigo pud kitang mopaambit sa atong gahom kanila nga adunay potential nga mamahimong mga maayong lider o pangulo. Dili maayo nga ang gahom kumkomon lamang sa pipila nga kun buot hunahunaon mga walay alamag sa ilang nahuptan."