Police clearance

Nagsunod-sunod na ron ang mga balita diin ang bana mipatay sa asawa ug uyab nga lalaki mipatay sab sa iyang hinigugma. Nanghitabo kining maong krimen dinhi sa ato sa Sugbo, didto sa Panay ug sa Metro Manila.

Nakapahinumdom kini kanato sa atong nabasahan sa The Ear column sa The Freeman diin giingon nga dihay usa ka amahan nga pangitaan og police ug NBI clearance ang suitor sa iyang anak nga babaye.

* * *

Ug diha sad toy usa ka pari nga misugyot sa atong kadalagahan sa pagsusi pag-ayo sa batasan kun kinaiya sa mga lalaki nga buot makigrelasyon kanila.

“Out of the ordinary kini nga butang sa ordinaryo ug tradisyonal nga situwasyon apan dunay punto ang amahan ug kadtong pari nga misugyot niini,” matud pa sa usa ka doktor sa human behavior.

* **

Namugna kining maong mga “out of the ordinary” nga suhestiyon tungod kay daghang mga gustong makigrelasyon nga mga lalaki ang mipakita o mopakita og maayong pamatasan -- mga buotan -- apan sa dihang naangkon na ang pagsalig sa babaye mausab na ang pamatasan.

Mao nga mahitabo ang wala damhang mahitabo.

Ato ra kining nahisgutan tungod kay nabalaka kita sa mga panghitabo karon diin sayon-sayonon lang ang pagpatay sa bana ngadto sa asawa o kapuyo.

* * *

TRIVIA. Pahalipay sa atong mga newsboy nga naninguhang makatabang sa pagpauswag sa sirkulasyon ning atong Banat News...ug salamat sad sa atong mga magbabasa nga nagpadayon og suporta kanato. God bless.