Mga reklamo na ‘sab

Balik ta og tagad sa mga reklamo nga akong nadawat. Miundang man gud ko kay kun magsigi na lang ta og patik sa mga reklamo, mawala na lang ‘sab ang akong lindog para sa opinyon.

Atensyon mga opisyal sa Consolacion. Dunay mireklamo sa bati kaayo nga karsada atubangan gayud sa Consolacion Community College nga naguba tungod sa kanunay’ng pag-agi sa mga dump truck sa David Justin Sand and Gravel.

Mireklamo sila kay tungod sa grabeng lapok, lisud na kaayo kadtong maglakaw nga moagi sa karsada. Aksyoni ninyo kining mga trak nga maoy nakapaguba sa karsada. Kamong mga opisyal, ipaayo sa nakaguba sa karsada ang maong agianan.

* * *

Nakadawat ko og text message gikan sa usa ka wala magpaila nga tawo nga nalipay nga padayon ang Probe nga gipangulohan ni Raquel Arce sa pagpanglimpyo sa mga daplin sa karsada.

Dili pa dugay gipapahawa ni Arce ang 16 ka vendors nga ang mga stalls gitukod daplin sa Arellano Boulevard. Nindot nga trabaho apan nahibulong lang ang “texter” nganong hangtud karon wala man malihok ni Arce ang paghawan sa Legaspi Street.

Husto kaayo ang maong texter. Gi-forward dayon nako ni Arce ang iyang text message apan wala motubag ang akong amiga. Ambot ngano kaha. Mora’g nahadlok pa tingali siya ni Kapitan Pancho Ramirez kay ang maong mga tindahan duol ni sa Barangay Hall sa Sto. Niño.

Nakadungog ko nga ang ubang tindahan iya sa mga tanod ug dunay “blessing” gikan sa kapitan. Nganong mahadlok ka man ni Kapitan Pancho? Iya man gani unta kana nga trabaho ang paglimpyo diha pero wala siya makahimo.

Wala gani siya makapangita og dapit nga kaparkingan sa mga sakyanan sa barangay, apil na kanang trak sa bombero.

Ngano, kinahanglan ba gayud nga anha kana diha iparking? Wala na ba g’yuy laing dapit nga kaparkingan?

Dili ba maayo nga ang fire truck adto i-standby sa Plaza Sugbo dapit sa City Hall? Hinuktuki kuno’g maayo Capt. Unya dili ‘sab ko motoo nga mobabag kini si Capt. Pancho Ramirez kun hawanan ni Arce ang karsada uy.

Sa ako na nga gibalik-balik, malooy unta kita sa mga tindera nga maapektahan apan dili man usab maayo nga tugutan na lang sila diha hangtud sa hangtud nga ang karsada gigamit na nila.

Palihug Ma’am Arce, lihoka na tawon kay duna nay mga tawo nga miapil sa pagreklamo. Kaniadto, tourist guides ang mireklamo kay nauwaw sila sa ilang bisita nga makakita sa laksot kaayo nga talan-awon diha.

Unya, para ni Mayor Michael Rama, palihog mayor, nindota ang bati, hapsaya ang gubot diha sa Legaspi!