Ngano man diay og mag-istorya sila si Davide ug Rama?

“Rama admits talks with Gov. Davide” – headline. “Davide confirms meeting with Rama,” laing headline. Ngano man diay og mag-istorya sila – what is it to you? Dili ba diay sila unta mag-istorya? Nganong gidaku man sa media ang ilang pag-inistoryahanay? Waa nay laing balita?

Ang duha mga alagad sa lungsod. Pulos mga pinili. Samtang si Gov. Junjun sakop sa LP ug si Mayor Mike, usa ka UNA, dili diay sila magtingganay?

Hinumdoman nga sila si Davide ug Rama, nagkauban sa city council. Sa ato pa, mga amigo sa pagpang-alagad sa lungsod. Ug tungod lang kay na-belong sila sa nagkalain nga partido, di na sila magtina … morag di kaila?

Buot nakong ipasabot nga “no big deal.” Niining ilang pagdumala sa lalawigan ug dakbayan sa Sugbo, dili diay mahimo nga magkahiusa ug magtinabangay sila, alang sa kaayohan natong tanan?

Buot ba nilang maoy mahitabo, nga tungod kay wala magtingganay sila si Tomas ug Gwen, di sad magtingganay sila si Junjun ug Mike? Ka dakung binata ini!

* * *

Mibutho na usab ang isyo sa Cha-cha kon charter change. Bitaw, daghan baya ang angayan usbon sa ato karong Konstitusyon. Apan, mora man og bahin ra sa giingon nga restrictive economic provisions ang ilang amendahon, aron kono daghan ang madani nga mga foreign investors ang madani pagsulod sa atong nasud.

Waa sila maghisgot og pag-shift ngadto sa Presidential Federal System gikan sa karon nga sistima nga conducive sa corruption. Sumaa kapila na ta mag-ilis og Presidente, waa gyuy nahitabo sa atong nasud. Nisamot hinoon tag ka-alaut ug ka walay nahut.

Sa ato pa, it’s the system, not the people, not the leader. Alang nako (apan, kinsa man ko!) angayan amendahon ang 1987 Constitution. Pananglitan, among other amendments, maayong wagtangon ang SK ug ang Party-list system. Kining duha, waa man niy nahimong kaayohan sa nasud. Sumaa!

Sa ubos kong pangagpas, kun magpabilin kita niining present system, di gyud molambo ang atong nasud. Ang numero uno natong suliran mao ang corruption. Apan, kun mag-federal system kita, lisud na ang pagpangurakot. Sayun na unya ang pagsubay sa matuwid na daan. Mao man gani tingali ang hinungdan ngano nga ang ato karong mga political leaders, dili ganahan sa Federal System. Among others, hadlok sila nga ma-waa ang pork barrel. Ug kinsa man unyay ganahan mag-Senador o mag-Representante, kun waa nay pork barrel?

* * *

Ang diborsiyo dili maoy solusyon pagpalampus sa kaminyuon. Sumaa, sa mga nasud nga ang mga bana o asawa nagpuli-puli lang og asawa o bana, nagmalampuson ba ang ilang kaminyuon? Malipayon ba ang ilang pamilya? Ug karon, himoon natong legal ang diborsiyo dinhi sa atong nasud? Mao ba ni ang formula aron makakita tag buotan nga bana o asawa?