Ang Dios Miingon Panabot sa usa ka bata mahitungod sa iyang kaugalingon

Ang tumong sa pagpahayag sa mga I-statements dili lang ang pagbuyag sa bata tungod sa iyang walay hinungdang binuhatan kondili usab ang pagpagawas ingon nga ginikanan sa imong gibati sama sa kasuko, kasagmuyo, ug pangluod nga dili ka makapasakit sa imong anak.

Mga praktikal nga tugon:

1. Gamita ang mga I-statements kun ikaw ma-irita. Ayaw paabota nga ikaw masuko.

2. Likayi ang paghatag og sulbad sa problema o pagbungat og mga mando ngadto sa imong mga anak.

3. Kun ugaling dili gihapon mosalir ang unang mga hut-ong sa mga I-statements, mas haom nga imong himoon ang pagbungat og mga laing mga I-Statements nga mas bug-at ug mas mabination (with feelings) kay sa nag-una.

Dako og kahimoan ang mga I-statements aron mausab sa imong bata ang dili maayong binuhatan nga dili makadaot sa iyang pagtan-aw sa iyang kaugalingon o dili ba kaha mahimong masamdan ang inyong relasyon.

Ang gikusgon sa imong tingog

Matud pa ni Arnold Bennett nga sa matag higayon nga ikaw makigsulti o mosulti sa imong isigkaingon mahimo nimo kining buhaton sa duha ka mga pamaagi:

1. Sa mensahe nga imong gisulti

2. Sa paagi nga imo kining gisulti/gibungat

Seguro si Bennett nga 90 porsiyento sa mga panagbingkil ang nagasukad sa tono sa imong sinultihan. Daghang mga ginikanan ang buot mopakita ngadto sa ilang mga anak nga nasayud na sila sa mga sunod nga mga lakang sa ilang mga  anak nga ang ilang anak walay laraw o plano nga tumanon ang ilang buot ipabuhat kanila. Ang tono sa tingog ang mopasabot niini. Sa laing bahin, ang mahudlatong tingog sa usa ka ginikanan ang dako kaayo og epekto sa bata. Adunay posibilidad nga gumikan sa dili kalikayang mga problema, kakapoy ug kahasol, ang mga ginikanan ang usahay makapataas sa tono sa ilang tingog ngadto sa ilang anak. Adunay mga ginikanan nga magpunay og “pamahid” sa ilang kaugalingong mga buslot ug sayop ngadto sa ilang mga anak. Ilang gipabuhagay ang ilang kasuko, kasagmuyo ngadto sa ilang mga anak, diin sila mismo ang wala masayud nga ang maong negatibong mga pagbati ang nagasukad ra diay sa ilang kaugalingon mismong kakulangan ug nga dili lang silang ganahan nga modawat o moangkon niini. (Sumpayan pa)