Ayaw na’g supak-supak

Sakto na.

Human na ang eleksiyon, ug ang mga bag-o ug nasubliang opisyal nanglingkod na alang sa lain na usab nilang mandato gikan sa mga tawo.

Gipili sila dili aron himuong mga señorito ug señorita, kun dili himuong mga muchacha sa katawhan.

Sa siyudad sa Sugbo, makapaabot pa ba kaha kita og tunhay ug malinawon nga kagamhanan nga ang mga konsehal sa Bando Osmeña Pundok Kauswagan (BOPK) klaro man nga nag-andam pagsungag sa pamunoan ni Mayor Mike Rama?

Sa paghurar pa lang sa mga bag-ong napili ug nasublian nga mga sakop sa konseho, nahibulong na ang upat ka mga konsehal nga dili BOPK nga mao lamang ang milusot nga sakop sa Team Rama, nga nabahinbahin na ang committee chairmanship sa konseho.

Mitiyabaw intawon si Konsehal Mary Ann delos Santos nganong siya ug iyang mga kaubanan wala hatagi og posisyon sa mga komitiba.

Siyempre! Unsa man diay mapaabot ni Mary Ann, hatagan siya og puwesto nga mayoriya man sa mga konsehal mga sakop man sa BOPK.

Kining ako pangutana lang.

Apan aduna na man gud kitay kasinatian sa unang termino ni Mike nga ang mga sakop sa konseho nga pulos sakop sa BOPK giingong tua magsunodsunod sa mando ni kanhi Kongresista Tomas Osmeña, ug ang mga programa ni Mike kanunay gibabagan pinaagi sa pagpiitpiit sa budget.

Sa pagkasayod sa mga tawo sa sitwasyon sa siyudad, napilde hinuon si Tomas.  Busa, ning panahona, dili angay mokompiyansa ang mga sakop sa BOPK nga anaa karon sa konseho.

Kun ilang ipakita ang ilang loyalty ngadto sa BOPK, unya padayon gihapon ang ilang pagka-obstructionist bisan maayo ang programa ni Mike, huwesan sila sa mga botante sa 2016.

Apan kun makita sa mga tawo ang ilang pagka-constructive members sa konseho unya ang ilang mga lakang tumong sa pagpalambo sa siyudad sa Sugbo, dili lang kay supak-supak kay lagi kontra nila si Mike, kuyaw og butangan og period ilang political career sa mga botante kun modesider na sila sa 2016 nga eleksiyon.

Ang gikinahanglan sa Sugbo kahiusahan sa tanan, dili supak-supak.