Ang Enzymes

Ang enzymes anaa gihapon sa mga pagkaong berdi o green sama sa dahon o utanon ug prutas. Ang lab-as aning dahon sa tanom o prutas, kun lamokoson o pug-on ni, may mogawas nga duga o likido nga pilit pilit, mao kana ang enzymes. Mas maayo kilawon o kaha itugsaw makadiyot sa tubig init. Kun lutoon man dili lang lat-an o palabian sa kalayo aron di mawala ang enzymes sa mga utanon.

Ang atong lawas adunay natural enzymes apan inanay kining momenus samtang magka-edad . Busa atong abunohan kini pinaagi sa pagkaon. Kay kun abunda permi ang lawas sa enzymes, mopakgang kini sa mga dautang sangkap sa makaon nato sama sa gipreserbar nga pagkaon o processed foods, polusyon o toksik ug mga mikrobyo nga dili masala sa tubig. Kini ang natural detoxification.

Ang enzymes kun permi anaa sa atong pagkaon adlaw-adlaw, padugayon ang enerhiya o kusog sa kinabuhi nato. Kun kulangon kini, dili makasugakod ang lawas nga tunawon ang sobra sa kaloriya o katambok ug protina. Kun dili kini atimanon, sa madugay maghatag kinig puwerhisyo o kahasol nga mopataas sa timbang ug daling maluya o makapatiguwang bisan batan-on pa kita.

Matud sa mga eksperto, ang enzymes makatabang usab sa pagpadali paghilis sa atong gikaon, sa tambok o kolesterol, sa protina ug mahimo sab kini sa pagsumpo batok sa tumor ug cyst. Dili usab dali madutlan ang lawas sa mga radiation sa palibot. Mosagang usab ni sa kadaut sa atong mga selyula human kun atakehon sa kasingkasing o mabantang sa unsa may makadaut sa lawas.

Napanid-an nato sa palibot nga halos tanan may sakit o dali matakboyan sa balatian hangtud mograbe kay kulang man sa mga sangkap o mga bililhong nutriyens nga ato nang gihisgutan dinhi. Makapupo unta kita’g giya nga ang tanang masayran nato nga kaayohan alang sa panglawas, diha-diha magbato’g kasibot sa pagbuhat dayon aron makalingkawas sa umaabot nga kabasolan nato.

Ang pagkaon maoy kusog o kinabuhi apan kun dili magkadimao mopatay usab kini kanato. Busa magkat-on kun unsay tukma o angay kaonon ug uban pang buhaton nga maangkon ang maayo o himsog nga lawas. Kun mataligam-an kini, mahimong hasolon kita sa daghang problema kay di na man magsilbi ang lawas nga maoy puhonan nga makab-ot ang atong pangandoy sa kinabuhi.