Ang Chlorophyll

Usa ni sa mga sangkap o nutriyens nga anaa sa atong mga pagkaon nga ang natural nga kolor niini mga berdi o green. Mga tanom nga ang dahon o bisag ang mga bunga ini green gani aduna kanay chlorophyll. Mahinungdanon kaayo kini gihapon sa atong panglawas nga mahimsog. Bentaha nga masayod kita kun unsa gayud ang dakong mahatag nga kaayohan niini. Aron usab kita magpakabana.

Ang chlorophyll ang nagpahimsog sa mga tanom pinaagi sa silaw sa adlaw. Gigamit kini sa tanom aron kuhaon ang carbohydrates gikan sa carbon dioxide ug tubig. Bililhon ang proseso niini, nga ginganla’g Photosynthesis. Kay mao kini naghatag kinabuhi sa tanang tanom, maingon nga nagkinahanglan usab kita’g mas daghang enerhiya gikan sa tanom. Mas maayo ni nga naa sa pagkaon nato.

Kining chlorophyll, sa mga expert sa nutrisyon, ila kining gipahimug-atan sa pagtuon, aron gayud mapuslan nga dili kini mawala sa inadlaw tang pagkaon. Nadiskubre nga makapataas kini sa atong pangedaron o malikay sa mabug-at nga balatian kun batasanon ang pagkaon nga may chlorophyll uban ang hustong paagi sa pagpreparar niani. Kay unsa diay ang mga benepisyo ini?

Ang Chlorophyll mopalimpyo sa atong dugo aron ayohon ang sistima sa sirkulasyon nga kahatagan og igo nga oksehena o oxygen.

Mobalanse usab ang presyor sa dugo ingon man usab mopanormal sa blood sugar levels.

Molimpyo usab kini sa mga hugaw nga nagtipun-og sa atong tinai o kolon.

Mopaabtik usab kini sa dugo nato. Padaghanon niini ang hemoglobin nga gikinahanglan sa red blood cells.

Sumpoon usab ang bahong gininhawa tungod sa toksins gikan sa respiratory system.

Mopatangtang usab kini sa mga sangkap sa pagkaon nga makadaut sa lawas.

Motabang usab kini sa atong minerals ug calcium nga mapuslan gayud sa atong lawas.

Mopugong sab kini batok sa mga impeksyons.

Maghatag usab kini permi og dugang enerhiya o kusog sa lawas.

Busa kun kaniadto lud-on ka o dili mahilig sa pagkao’g utan o prutas, usbon nato’g gamay ang atong kinaiya, nga sugdan na karon ang pagkaon niani. Dili baya hibintahaan ang kalami ini kun maanad na. Mogaan, dasig, alisto, abtik ang bation sa lawas. Ingon sa dili maugtas, ligdong, malipayon ug molahutay unsa may gimbuhaton ning kinabuhia, daw mosanag ang katumanan sa pangandoy.

Q