Panahon na usab sa tingbaha

Panahon na usab sa ting-uwan human molabay ang ting-init. Kini ang gipahibalo sa mga taga PAGASA. Pero pahibaloon man ta sa nahisgotang ahensiya sa gobyerno o dili sayod na kita nga panahon na gayod sa ting-uwan tungod kay sige na man ang pag-uwan.

Ang pag-abot sa ting-uwan nagdala gihapon sa samang suliran nga atong nasinati sa nanglabay nang katuigan. Ang mga pagbaha sa bisan asang dapit sa Metro Cebu ang naghatag na usab og kahasol sa katawhan sa ilang adlaw-adlaw nga gimbuhaton. Naghatag kanato og kalangay ug kakuyaw sa atong mga lakaw kay sa Metro Cebu kung mag-uwan ang kadalanan mahimo nang kasapaan ug dagkong suba.

Ang mga pagbaha sa Metro Cebu walay kalainan sa mga pagbaha sa laing mga lugar sa nasud. Ang atong nasinating mga pagbaha dinhi sa Metro Cebu mao usab kini ang nasinati sa ubang katawhan didto sa Luzon ug Mindanao.

Ang mga pagbaha nga atong masinati panahon sa ting-uwan taudtaud na apan wala pa gihapon kini mahatagi og hingpit nga kasulbaran sa atong mga awtoridad seguro tungod sa kakuwang sa pundo nga gigahin alang niini o ba kaha tungod kay ang maong suliran moabot lang panahon sa ting-uwan maong ang ubang mga lokal nga kagamhanan wala kaayo magtagad sa maong suliran.

Daghan ang hinungdan sa mga pagbaha ug usa na niini ang mga naopaw natong kabukiran tungod sa mga subdivisions nga gipangtukod. Tungod kay naopaw na ang kabukiran wala nay gamot sa mga kahoy nga makasangga sa kusog nga bul-og sa tubig nga mopaingon sa ubos kansang mga kanal dili na tukma ang gidak-on. Ang lain usab nga dako og gikatampo sa mga pagbaha mao ang pagka walay pagpakabana sa pipila ka mga tawo nga magpasagad lang sa paglabay sa ilang basura sa mga kanal nga maoy nakabara sa pag-agi sa tubig paingon didto sa dagat.

Kining maong mga hinungdan nakita na sa atong mga awtoridad maong ang uban kanila mihimo na og tukmang lakang sama sa kagamhanan sa dakbayan sa Sugbo. Wala pay ting-uwan nangandam na si Mayor Mike Rama ug ang iyang kagamhanan sa mga pagbaha pag-abot ning panahon sa ting-uwan pero gibabagbabagan lang siya sa mga konsehal pinaagi sa pagharang sa pundo alang niini nga maoy nakapalangay sa pagpadako sa mga kanal ug sa pagpanglimpiyo sa kasapaan.     

Pero mintras tanto nga wala pay pundo ang mga lokal nga kagamhanan dili lang ang dakbayan sa Sugbo ang mga pagbaha maminusan kana kun ang katawhan motabang na ug magpakabana sa suliran sa mga pagbaha pinaagi sa paghunong na sa pagpasagad og labay sa ilang mga basura.