Hilas-hilas nga pagdagan

CICC, Mandaue City — Inig buto sa armas pagtimaan sa pagsugod sa pito ka kilometro nga lumba sa dagan sa alas-5 sa kaadlawon karong Domingo, mokuyog ko sa kaliboan ka runners nga moapil sa DYAB Kapamilya Run nga magsugod ug matapos dinhi. Mao ni labing taas nga lumba nga akong maapilan. Mokumpisal kong daan nga di ko andam.

May kasabot kong magpraktis og dagan pila ka adlaw sa di pang lumba. Apan tungod sa pagsige og uwan ug labaw sa tanan tungod sa among katapolan wa mi magkaabot. Nagpasaligay na lang nga mag-iyahay. Nahadlok kong sama nako way bisan usa sa akong mga kasabot ang nakahigayon.

* * *

Human sa akong pag-apil sa Kapamilya Run sa niaging tuig, kanus-a unom ka kilometro ang akong gidaganan, duha ka adlaw kong nagkaang-kaang paglakaw. Nakasaad ko nga di na lang mangambisyon. Apan karong tuiga, tungod tingali sa mga sungog sa akong pangedaron, nangahas na sab ko sa pagpalista.

Mabalak-on nakong mga higala nagsusi unsaon nako paglahutay nga matag Kapamilya Run ra man ko modagan. Gipasaligan nako silang molakaw lang ko kun di na maagwanta. Apan sa hilom nanumpa gyud nga kutob sa mahimo suwayan nako nga lunlon dagan ang akong himuon. Gipasidan-an hinuon ko nila nga mas uwaw kay sa pagbaktas ang makuyapan.

* * *

Kuyog nako og dagan sa niaging tuig si anhing Marlon Bellita. Kansang lahutay wa gyo’y problema. Nagbalikbalik na lang pagdagan libot sa ruta apan wa gyud mi niya biyai bisan klarong gipul-an og paabot sa among kahinay.

Wa na si Marlon karong tuiga. Apan nanghinaot kong managan lang gihapon ang orihinal namong grupo, kun di man mapun-an pa--silang Klasmit Yul Julia, JT Benz, Juve Villar ug Edison Delos Angeles. Kun sama namo nagduda sab sa imong lahutay mangahas ko pagdapit nimo sa pagkuyog namo. Sayon ra ming tultulon--pangitaa lang ang labing hinay nga panon.

* * *

Lain nakong suliran: Nalata nang sapatos nga akong gigamit sa lumba sa dagan sa niaging tuig. Gidapit kong Klasmit Yul nga mamili og bag-ong sapatos sa ilang tindahan. Apan may nakahunghong nako nga di maayo nga bag-ong sapatos ang gamiton sa lumba--gawas kun ganahan kang luthan ang imong mga tiil.

Maong gikuyawan ko nga gawas nga hinay nga modagan magkawil-kawil pa gyud ang natangtang nang tumbanan sa akong sapatos. Sagdi lang, di man pagdaog ang among tuyo sa pagdagan. Makapasalipod man mi sa kawsa nga ang tanang matigom sa lumba itabang sa labing kabos nga publikong mga eskuylahan sa Sugbo.

Nahibawo ko, way lehitimong katin-awan ang among pagpatuyang pagpadagko sa among tiyan ug paghilas-hilas pag-apil sa tinuig nga lumba sa dagan. Apan mas maayo nga kutasan sa kakapoy inay mangiyugpos nga magtan-aw sa mga nagkadusingot sa pagdagan.

* * *

Email: [email protected].