Ting-uwan na sad

Nagmalampuson ang pormal nga pagbukas sa klase alang sa school year 2013-2014 sa pampublikong mga tunghaan. Gani hapsay kini ug wala kaayo'y mga problema.

Niadtong Lunes Hunyo 10, 2013 nagsugod na usab ang klase sa mga pribadong eskwelahan gikan sa elementarya ug hangtud na sa kolehiyo. Dili lamang ang mga tunghaan ang andam lakip na usab ang mga boarding houses ug dormitory nga maoy puy-an sa mga estudyante nga dili taga Sugbo.

Kay lagi subsob man ang pag-conduct og fire safety inspection sa atong kabomberohan aron masuta gyud nga luwas kining puy-an. Sa kadtong mga tag-iya sa maong mga boarding houses ug dormitoryo palihug lang pud intawn pagsunod sa mga recommendation sa atong kabomberohan aron hingpit nga luwas kini sa sunog.

Sa pikas bahin, kun nakabantay mo magsige na og uwan karong mga panahona. Ug matud pa, nahuman na gyud ang summer unya mosunod na dayon ang sigeng uwan. Kun nakabantay mo mag sige na lang kita makasinati og kusog nga pagbunok sa uwan ubanan sa kusog nga liti ug dugdog.

Angayan natong pahimangnoan ang publiko hilabi na gyud sa mga lupa nga lugar diin dali kaayong mabahaan ug bisan hinay ra ang uwan nga sa kanunay magmabinantayon aron dili mabutang sa peligro ang sakop sa panimalay.

Kun sa inyong tan-aw dunay dakong tsansa nga modako ang tubig sa inyong lugar paghinayhinay na lang kamo og balhin sa luwas nga lugar.

Alang sa kasayuran sa publiko, dili lamang sunog ang tubagon sa atong kabomberohan. Moresponde kami sa mga emerhensiya ug bisan unsang kalamidad basta lang maabot kini sa among kasayuran.

Maong kun modako ang tubig baha sa inyong lugar ayaw kamo pagpanuko pagtawag sa mga istasyon sa kabomberohan kay duna kita'y well trained personnel nga motubag sa inyong tawag.

Ang Special Rescue Unit (SRU) matawag nato og elite force sa Bureau of Fire Protection sa natad sa rescue operations. Ang mga sakop niini miagi sa makuti ug rigid training aron mamahimo silang andam sa pakigkombati sa bisan unsang emerhensiya nga itawag sa among opisina.

Apan dili unta kita magsalig niini nga duna kitay abtik nga rescue units mas maayo nga dunay pagpakabana ang publiko ug dili unta magmagahi nga mohikling sa safe nga lugar kun sa inyong tan-aw dunay dakong peligro.