Tom O pagka-barangay kapitan?

Ting-uwan na. Panahon na usab sa lunop ug baha. Andam na ba ang atong local government units (LGUs) ug ang mga ahensiya sa gobiyerno aron sa pagbabag sa maong panghitabo?

Ang nag-unang buluhaton sa LGUs mao ang paglimpiyo sa mga kanal, imbornal ug kasapaan. Nagkinahanglan kini'g dakung salapi aron igasto sa pagpamalit og mga ekipo sama sa excavator nga gamitunon kaayo alang sa maong katuyuan.

Manghinaut ako nga dili na lang unta babagan ang paggahin og salapi alang niini hinunoa maghiusa ang tanang mga politiko aron mapugngan kining maong kalamidad.

* * *

Anaay  tabitabi sa mga kapihan ug barberohan nga modagan kuno si Kong. Tomas Osmeña pagka-barangay chairman kon kapitan niining umaabot nga barangay election sa Oktubre.

Ipakita kuno ni Osmeña nga lig-on gihapon siyang politiko. Kun modaug siya pagka-kapitan modagan siya pagka-presidente sa Association of Barangay Council (ABC). Kun mapili mahimo siyang konsehal sa siyudad.

Pagkarisgo kun himoon kini ni Osmeña. Unang bahin, dili masiguro nga modaug siya sa Barangay Guadalupe kun iyang makaatbang si kanhi Barangay Kapitan Jingjing Faelnar nga paluyuhan na ni Mayor Mike Rama.

Ibutang ta nga modaug siya isip presidente sa ABC kontento na ba lang siyang mahimong konsehal?

Kun tinuod man kining maong tabitabi, anaa ako’y unsolicited advice alang kang Kong. Tomas- kalimti kini!

* * *

Aniay reklamo nga akong nadawat gikan sa pipila ka mga residente sa Sitio Boracay, Bgy. Tabunok, Talisay City- kalabut sa usa ka "Shabu Tinda-tinda" sa maong dapit.

Sa mga litrato nga ilang gipada akong nakita nga ang mga pakite sa shabu giladlad lang sa lamesa diin anaay mga bata nga nanglingkod.

Kita usab kaayo kini sa tanang tawo nga mangagi sa maong dapit. Daghan usab kunong mga tawo gikan sa nagkalainlaing dapit ang mamalit og shabu sa maong tindahan.

Sumala pa sa nireklamo nga walay nahimo ang mga opisyal sa barangay ug ang mga tanod. Nagduda sila nga nagdawatan sila  niining maong druglord.

Por bida no sama naman kini sa kauluhan diin anaay mga tiyanggi sa shabu.

Akong nasayran nga nisuwat na sila kang Department of Local Government (DILG) Sec. Mar Roxas, Sen. Tito Sotto, Executive Sec. Paquito Ochoa, Police Dir. Gen. Cesar Purisima, Usec. Arturo Cacdac, Jr., PNP Chief Supt. Samuel Yordan ug Atty. Paul Ouaminal kalabut niining maong problema.

Kun tinuod kining maong report dili na gyud ko motoo nga dili masikop ug mahunong kining iligal nga kalihukan niining maong druglord nga giila gayud sa mga reklamante.

* * *

Email: [email protected].