Tamparos sa awtoridad
Unsay nahitabo sa kahapsay ug kalinaw sa Sugbo?
Wa ug tuo ang tulis ug patay sa miaging semana. Unang gibiktima ang Palawan Express Padala outlet diha sa A. Soriano St. North Reclamation Area.
Ang tulo ka mga tulisan misakiyo sa P150 mil nga cash, cellphones ug laptop.
Ang maong pagpanulis nahitabo atbang gyud sa Mabolo Police Station. Apan bisan kun maabot lang og lud-an ang police station, pakyas ang kapolisan pagresponde gilayon. Resulta nakasibat ang mga tulisan nga nagbilin og dakong sagpa sa mga awtoridad.
Human sa 24 oras laing pagpanulis ang nahitabo didto sa dakbayan sa Naga. Usa ka branch sa MLhuillier Pawnshop ang gitulis. Sama sa unang pagpanulis wala sab madakpi ang mga tulisan.
Dili pa igo ang kauwawan nga gimugna sa mga kriminal ngadto sa kapolisan, usa ka konsehal sa Argao ang gipatay. Si konsehal Joaquin Banosong gipusil ni gawas sa merkado sa lungsod. Nadakpan na hinuon ang giingong mamumuno apan naglibog pa ang kapolisan unsay motibo sa krimin.
Sunod nga gipusil mao ang traffic enforcer nga si Gilig dinhi sa dakbayan sa Sugbo. Ang gitumbok nga responsabli mao ang kanhi polis nga si Jeoffrey Borinaga. Lalis sa trapiko maoy giingong hinungdan. Nadakpan na hinuon si Borinaga.
Apan samtang gipakita sa kapolisan ang ilang kapaspas sa pagsulbad sa duha ka sunod-sunod nga kaso sa patay, laing tamparos ang ilang nadawat dihang usa gyud nila ang nabiktima sa linuog nga krimin niadtong Sabado sa kadlawon diha sa Barangay Kamagayan.
Si PO2 Gerlito Estremos nagpatrolya sa R Landon dihang gikawat ang helmet sa iyang motorsiklo.
Gisuwayan niya paggukod ang kawatan apan dihang iyang nakit-an sa Kamagayan duna na kini kauban. Gisita sa polis ang duha nga niadtong tungora luwan sab og motorsiklo.
Apan gili-ab ang polis ug gikulata, giilogan sa iyang armas ug gipusil. Bisan sa pagpaila ni Estremos nga siya tinugyanan sa balaud apan yano lang siyang gikulata ug gipatay.
Kun nahimo ni sa mga kriminal sa usa ka polis unsa na kaha sa civilian. Busa gikinahanglan ang mas hugot ug seryoso nga kampanya niining tungora batok sa mga kriminal.
Way luna ang binabaye nga liderato niining panahona nga ang mga kriminal dili na moila bisan sa awtoridad.
Kun gikinahanglan ang "kamot nga puthaw" aron pagbadlong niini angayang buhaton sa gobyerno.
Wala ko magdasig sa kapolisan o ni bisan kinsa nga mohimo og kalapasan sa tawhanong katungod apan kun ang paghimo sa ingon maoy makapitol ug makapabut-an sa mga kriminal mas palabihon nako nga lapason sa awtoridad ang katungod sa mga kriminal kaysa ang kinabuhi sa mga inosenti ang ilang utangon.
Kini tungod kay ang usa ka kriminal nga mahanaw sa kadalanan bugti ni sa pagkahanaw sa usa usab ka krimin.
* * *
- Latest
