Unsaon pag-revoke sa last will and testament?

Kun ang usa ka tawo naka execute na og Last Will and Testament wa kana magpasabot nga magapos na siya niini tungod kay ang atong balaod adunay mga lagda kun unsaon pag-revoke ang gihimong Last Will and Testament. Unsay angayang buhaton kun gusto nimong usbon ang nahaunang Last Will and Testament nga imong gihimo? Kana nga pangutana ang akong tubagon karon sa akong column.

Dear Atty. Divine,

Aduna koy gihimo nga Last Will and Testament niadtong miaging tuig nga nag-distribute sa akong mga kabtangan kay wa man koy mga anak ug patay na usab ang akong bana. Ang akong gihimo nga heirs sa akong Last Will mao ang akong mga igsuon ug mga pag-umangkon nga nagserbisyo kanako. Apan karong bag-o aduna koy nadiskobre sa akong pag-umangkon nga nakapausab sa akong desisyon ug gusto nako siyang tangtangon gikan sa akong Last Will and Testament. Mamahimo ba nako nga usbon ang akong Last Will? Unsa may maayo nako nga buhaton aron kini mausab? Hinaut nga imo kong magiyahan kun unsay angayan nakong buhaton . Daghang Salamat. —Cora

Dear Cora,

Salamat sa imong pag-email. Tungod kay wa kay compulsory heirs sama sa mga anak o bana, mamahimo ka nga mo-distribute sa imong estates o kabtangan sa mga tawo nga gusto nimong binlan niini pinaagi sa Last Will and Testament. Kun ikaw naka execute na og Last Will and Testament kaniadto, mamahimo kini nimong irevoked.  Basi sa Article 828 sa atong Civil Code kini nagkanayon: A will may be revoked by the testator at any time before his death. Any waiver or restriction of this right is void. Buot ipasabot nga samtang buhi pa ang testator mamahimo niyang ipa-revoke ang iyang Last Will nga gihimo. Ang atong balaod usab naglatid sa mga paagi alang sa pag-revoke sa Last Will and Testament basi sa Article 830 sa atong Civil Code ug ang pag-revoke naglakip sa mosunod: 1) By implication of law,  2) By some will, codicil or other writing executed as provided in case of wills,  3) By burning, tearing, cancelling, or obliterating the will with the intention of revoking it, xxx . Busa kun nausab ang imong huna-huna kun kinsa nga mga tawo nga imong binlan sa imong kabtangan ang maayo nimong buhaton mao ang pag- execute og laing Last Will and Testament og  ipabutang gyud nimo sa imong ikaduhang Last Will nga imo nang gi-revoked ang unang Last Will nga imong gi-execute, busa kadtong unang Will nga imong gihimo mamahimo kadto nga imong sunugon o gision. Aron mamahimong balido ang imong ikaduhang Last Will and Testament, kinahanglan gyud nga matuman niini ang rekisitos sa atong balaod sama sa pagpirma niini atubangan sa presensya sa tulo ka mga testigo ug sa notary public ug  ang mga testigo kinahanglan sab nga mopirma atubangan sa imong presensya og sa notary public ug ang labing importante nga ikaw gyud mismo ang magbuot kun kinsa ang imong hatagan sa maong kabtangan og nasayud ka kun unsay epekto sa imong gihimo nga Last Will.  Hinaut nga akong natubag ang imong pangutana. Thanks and God Bless. —Atty. Divine

Alang sa  inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected]. ug akong tubagon ang inyong pangutana matag adlaw’ng Miyerkules ug Domingo.