Ayaw’g drayb kun hubog

Karon nga aduna na g’yuy balaod nga mosilot sa mga tawo nga magmaneho og sakyanan nga ubos sa gahom sa ilimnong makahubog ang pangutana kun kanus-a kini ipatuman.

Bisan og ang Republic Act 10586 gipirmahan na ni Presidente Benigno Simeon Aquino III apan kinahanglan pa ang Implementing Rules and Regulations (IRR) kun unsaon kini pagpatuman.

Ikaduha, kinahanglang hitsasan usa sa kagamhanan og mga breath analyzer nga karon gitawag og breathalyzer nga mosukod sa Blood Alcohol Content (BAC) gikan sa usa  ka “breath sample.”

Breath analyzer gayud ang ngalan sa mao nga gadget o kahimanan apan kanang gitawag og breathalyzer usa lang kana ka brand sa mao nga produkto.

Sukdon niini nga kahimanan kun pila ang alcohol content sa nagmaneho og sakyanan ug kun mamatud-an nga molapas na sa gitugot sa balaod, multa ang drayber.

Duna may mga portable tester niining mga breath analyzer nga mahimong mapalit sa kagamhanan ug iisyu sa mga road law enforcers sama sa sakop sa PNP Highway Patrol Group ug Land Transportation Office (LTO).

Sa IRR kinahanglan nga pagamugnaon unya uban sa kadagkoan sa Department of Health (DOH) kinahanglang ilatid gayod kun pila ang alcohol content nga mahimong dakpon na ang mga drayber. Tungod sa kadagko sa multa nga ipahamtang sa mga drayber nga masakpan nga milapas niining maong balaod, daghan ang gikuyawan.

Sayonan ka nga kun masakpan ka nga nagmaneho og sakyanan nga “under the influence of liquor” multahan ka hangtod sa P80,000 ug kun makamugna og “injury” ang multa moabot og P200,000.

Kun ang aksidente nga namugna tungod sa hubog nga drayber ang multa mahimong moabot og P500,000 kon tunga sa milyon. Nindot man ang katuyoan niining maong balaod apan ambot og makapakalma ba kaha kini sa mga drayber nga momaneho og sakyanan nga nakainom.

Alang kanako, dili man dakpon kun nakainom ka’g pipila ka botelya sa beer unya mo-drive ka pauli nga tarong gihapon ang pagpadagan sa sakyanan.

Apan kun ang dinaganan sa sakyanan mag-ikis-ikis na nga makahatag og peligro sa ubang motorista, anha pa diha nga angay’ng dakpon ang drayber ug kuhaan og liquor test pinaagi sa pagamit og breath analyzer.

Sigurado hinuon ko nga dili kini sayon nga ipatuman. Kun gusto gayud si Presidente Aquino nga hingpit nga mapatuman kining maong balaod angay siya nga magmugna og “composite team” nga tahasan niini.

Ang “composite team” kon task force kinahanglang langkoban sa mga sakop sa LTO, Highway Patrol, Philippine National Police (PNP), Armed Forces of the Philippines (AFP) ug ubang law enforcement units.