Sa pagbukas sa klase sa kabataan

Mag-ambahan sa pagpaingon sa nagkadaiyang tulunghaan ang kabataan nga mosulod sa ilang mga lawak saringan sa pagsugod usab sa klase sa tuig tingtungha niining tuiga.

Ang mga publikong tulunghaan nga gidumala ubos sa  Department of Education (DepEd) daan na nga naghimo sa ilang pagpangandam sa tuyo nga sa pagbukas sa klase matibhangan usab ang masinati nilang suliran nga naglakip sa kulang nga mga lawak saringan.

Daghan ang nag-ingon nga dugang pa nga  suliran nga masinati sa mga publikong tulunghaan ang kakulang sa mga lawak saringan nga maoy makaingon nga moresulta sa pagsinardinas sa kabataan.

Matud pa nila nga naandan na gayod sa matag tuig ang 10 porsiyento nga  gidaghanon sa pag-usbaw sa kabataan nga motungha sa mga publikong tulunghaan ug gipaabot nga dako pa gayod ang porsiyento ang pag-usbaw sa gidaghanon karong tuiga. Ang pag-usbaw sa matrikula sa mga pribadong tulunghaan maoy nahimo lamang kabahin sa mga hinungdan sa pag-usbaw sa gidaghanon sa kabataan nga motungha sa publikong tulunghaan.

Gitataw nila nga  daghan sa mga ginikanan nga nagpatungha sa ilang kabataan sa pribadong tulunghaan kaniadto ang namalhin na karon sa pagpatungha sa ilang mga anak ngadto sa publikong tulunghaan nga ang hinungdan mao ang  pinansiyal.

Dugang pa nila nga kini nagpasabot lamang nga ang gipasiatab  sa kagamhanan nga pag-usbaw sa ekonomiya sa nasud wala pa gayod diay kini  matagamtam  sa katawhang Pilipinhon tungod kay daghan pa man gihapon ang nag-ilaid sa kalisod.