EDITORIAL - Binuang sa ubang polis gipasiunang daan

Gitag-an  sa ubang  tigpaniid  nga  pahimuslan  sa  malditong  mga  polis  ang  balaod  nga  nagdili  sa hubog  pagmaniho  og  sakyanang  de motor.

Gipasiunang  daan  nila  nga  sayon  ra kaayong  makakuwarta  ang  polis pinaagi  sa  pangilkil  niining  balaora.

Kay  atangan  lang  kuno  sa malditong  polis  ang  mga  mag-inom  sa mga beer house magabii,  unya  inig maneho  niini  og  sakyanan  sundan, dayon  parahon  ug  sitahon,  ug  kumo  kay  hubog  makuwartahan  gyud  kay  mobayad  naman  lang  kini   agi  og  pag-areglo  sa iyang  kahubog  kay  sa  mahiadto  pa  siya  sa buhatan sa kapolisan  aron  pasakaan  og  kaso.

Mura’g  mao  gyud  kini  mahitabo,  ilabi  na  kun  ang  usa  ka  polis maglabad  ang  ulo  kay  way  kuwarta.

Taym  pa, kining  maong  matang  sa kumentaryo mura  man  og  gipakagamay  ang  pagkatawo  sa  polis  niini  ug  mura  og  menos  na  kaayo  ang  pagtan-aw  sa publiko  sa kridibilidad  sa kapolisan. Nga  ang  tinuod  kung  may  bad apples  sa kapolisan  naglabi  baya  ang  mga buotan  diha.

Mao  man  gani  nga  tungod  kay  kining  mga  malditong  polis  nga  pila  ka  buok  makadaut  man  sa dungog  sa tanan,  kinahanglang  kutob  sa mahimo  kun  masakpang  magbinuang  ipatangtang  dayon  aron  nga mawagtang  ang  mga  dautan  gikan  sa maong  grupo.

Kay  ang  mahitabo  gud, kun  ang  buhat  sa polis  nga  dautan  tabon-tabonan  matag  himo  niini  og  binuang  sama sa pagkigkombuya  sa mga  drug  dealer,  mga   sugarol  ug  uban  pang  mga  sindikatong  kriminal, aw guba  gyud  ang  dungog  sa kapolisan  sa katibuk-an  ug  makuwangan   sa pagsalig  ang  katawhan  sa  maong  mga  otoridad.

Kini  lang  bag-ong  balaod  karon  bahin  sa pagdili  sa hubog  sa  pagdala  og  pagmaneho  og  sakyanan,  way  laing  nalantawan  ang  mga  tigpaniid  kundi  ang negatibong   epekto  niini  sa  bahin  sa kapolisan  ug  wa  tan-awa  ang  uban  pang  kadaut  nga  idulot  sa kinabuhi  ug  kabtangan  sa  mga  tawong lasbag  sa bino  ug  illegal  nga drugas  nga  mo-drive  og  sakyanan  sa kadalanan  hinungdan  nga  gimugna  kining  balaora. Nganong  dali  ra kaayong  nahunahunaan  sa  mga  tigpaniid  ang  tataw  kaayong  himoon sa kapolisan  niini, tungod  sa daghan nilang  napanid-an  nga  may  mga  polis  nga  nagsilbing  protektor  sa  mga  kapitalista  sa gidiling  drugas,  mga  illegal  nga  sugal  ug  uban  pang  sindikatong  kriminal.