Grasya sa K to 12

Hingpit nang balaod ang K to 12 program sa Dept. of Education. Kun kaniadto daghan ang niisa ang kilay lakip na mga magtutudlo, tungod sa pagdugang og ang-ang sa tuig ting-tungha, karon nakadawat og makabungog nga pagdayeg ang maong lakang sa administrasyong Aquino. Ang K to 12 ang nakitang solusyon aron mas musaka pa ang kalidad sa edukasyon sa nasud nga dugay nang nabintahaan sa mga silingan nga nasud sa Asya. Ang kaniadtong giisip nga labing lig-on nga edukasyon nga nasud, karon nabiyaan na.  Salamat sa K to 12 program ug adunay nakitang kahayag sa matang sa edukasyon sa nasud. Luyo sa bagulbol sa mga ginikanan, karon mas daghang positibong hatod ang programa sa nasud. 

Mokabat sa 60  mil ka mga bag-ong magtutudlo ang gikinahanglan karon aron nga mahatagan og tubag ang dugay nang panginahanglan sa dugang pang mga titser. Kung basehan ang datos sa Dept. of Education, matag tuig ang panginahanglan og mga magtutudlo hangtod nga hingpit ang pagpatuman sa K to 12 program. Wa’ pay labot sa panginahanglan sa mga bag-ong magtutudlo ang tinuig nga pagpasaka sa populasyon. Tungod sa maong aspeto, gipanglantaw nga dinhi sa tunga-tunga Kabisay-an lang daan, gamay ra ang usa ka libo nga bag-ong magtutudlo nga kuhaon sa DepEd.

Gipasalig sa ahensya ug daghan ang nituo sa maong pasalig, nga di’ na masalir ang ‘palakasay system’ sa pagkuha og bag-ong mga magtutudlo. Ang kadtong mga nipasar og dako ang grado sa pasulit pun-an pa sa ilang kasinatian, ang mas mabulahon kung ang pag-hire na ang hisgutan. Kung tan-awon ang pasalig sa DepEd, pagkanindot kun mga kalidad nga magtutudlo ang magdominar sa mga tunghaan. Natural lang nga mopaingon sa  DepEd ang mas de kalibre nga magtutudlo tungod sa kadako sa suholan nga gigahin alang kanila.  Kung ang teacher 1, modawat og sugod nga suholan nga 20 mil pesos, maglisud na pag-apas ang pribadong mga tunghaan niini.  Ug ang usa ka magtutudlo nga adunay igong kapasidad ug kalidad, karon di’ na magpanuko sa pagtudlo sa publikong tunghaan itandi sa pribado.

Di’ sa pagkumpara apan maingon niini ang sitwasyon karon labi pa kung suweldo ug laing benepisyo ang hisgutan.  Nakatagamtam na ang mga pribadong tunghaan sa kanihit sa mga maayong magtutudlo.  Ang rason—sagad sa mga maayo tua na sa mga publikong tunghaan tungod sa ka maayo sa mga benepisyo.  Kung kini ang magsige, moabot ang panahon nga mas de kalidad pa unya ang gradwado sa mga publikong tunghaan sama sa nahitabo na karon sa uban.  Wa’ na unya’y rason nga mobati og diskriminasyon si Inday ug si Dodong tungod kay mismo sila nga taga publikong tunghaan di basta-basta ang nadawat nilang edukasyon.

Daghang ginikanan ang nangutana unsay tukmang kurso alang sa ilang mga anak.  Sa pagpangita sa gobyerno og dugang mga magtutudlo nga adunay maayong benepisyo, panahon na aron di’ yatakan ang kursong edukasyon.  Kung kaniadto, mabawi lang sa pag-ingon nga sila ang tig-umol sa bag-ong henerasyon, karon  adunay laing rason aron daghan ang mokuha sa maong kurso.  Gawas sa garbo nga hatud isip magtutudlo, dakong grasya ang nagpaabot nila.  Sa maong paagi, mas mahatagan og igong pagsalig ug katakos ang mga magtutudlo sa paggiya sa bag-ong henerasyon  labi pa ang mga anaa sa publikong tunghaan.  

Sa bag-ong balaud sa K to 12, di’ lang ang pagpalapad sa kaalam sa mga tinun-an ang makabenepisyo ining tanan.  Labaw nga magngisi niini kadtong libuan ka mga magtutudlo nga wa’ pa makatrabaho.  Karon, adunay nagpaabot kanilang trabaho sa matag tuig ting-tungha tungod sa mas gipalapdan nga prayoridad sa edukasyon.  Ang giisip nga buhing bayani nga mga titser, karon mobati og bayanihong suporta sa gobyerno.  Wa’ nay rason pa aron mangiwit ang nasud inubanan sa paghatag og dugang pasilidad diha sa matag tunghaan.  

* * *

Email: [email protected]. or [email protected].