Bisikleta

Gihatagan na kuno og atensyon ang bike lane idea. Manghinaut kita nga kahatagan gyud og katumanan kining maong ideya.

Daghan ang miuyon niining bike kon bicycle lane alang sa mga tawo nga walay sakyanan de motor sama sa kotse ug motorsiklo.

* * *

Kun mapahimutang na kini’g klaro, daghan na ang manakay og bisikleta padung sa trabahuan ug eskuwelahan, ug pauli gikan ining mga lugara.

Dili lang kay makadaginot sa gasto sa pamilite kundili sab makaehersisyo alang sa maayong panglawas.

* * *

Kun daghan na ang modangop sa biskleta isip ilang regular nga transportasyon mahamenusmenusan ang polusyon nga ibuga sa mga tambutso sa mga sakyanan de makina.

Daghan na kitang nadunggan nga kun maplastar na ang bike lanes, magbisikleta na lang sila padung sa ilang adtuan ug pauli.

* * *

Sa ubang dapit sa Asya ang bisikleta nahimo na kini nga transportasyon sa mga tawo bisan kadto pang mga adunay sakyanan de motor apan gustong mo-ehersisyo alang makab-ot ang maayong panglawas ug makatipid usab sa gasto sa pamilite.

Sa Vietnam bisan mga pari ug madre atong makitang nagbisikleta. Gani didto sa Vietnam atong makita nga ang bisikleta gihimo nang morag trak de karga kay bisan unsa na lang ikarga man sa mga namisikleta.

* * *

TRIVIA. Mangumusta kita sa atong mga suking magbabasa diha sa dan Katipunan ug barangay Tisa ning siyudad. Daghan salamat sa inyong walay hunong nga suporta sa Banat News.