Si Sir wala sa opisina

Usa ka kasaligang tinubdan ang mihunghong kanako nga ang hepe sa usa ka departamento sa Bureau of Customs sa Port of Cebu ang wala magtrabaho sa iyang opisina, hinuon atoa kini kanunay magyampungad sa Edies Hotel duol sa Mango Avenue ning dakbayan. Gawas nga wala kini magtrabaho sa iyang opisina, ang giingong department head dili pa gyod kamao mokuwenta sa mga bayranan nga buhis sa iyang opisina.

Kining maong department head nagdala sa mga opisina sa Visayas ug Mindanao nga ubos sa iyang departamento.Ingon ani ka dako ang coverage sa iyang trabaho pero wala diay siya magtrabaho kay maoy giuna ang pagsige og pabugnaw sa hotel nga ako nang nahisgotan.

Kun wala kay gana sa imong trabaho biya ug ayaw pagpabaga sa imong nawong Sir. Kun dili ka makamao sa imong trabaho ayaw paglangay biya dayon. Ayaw himoang gatasan ang gobyerno sa imong pagka walay kabangkaagan sa imong trabaho. Kun kinsa man ka makonsensiya ka Sir!

Kinsa bay nagbayad nang imong lingaw-lingaw sa hotel Sir, ang gobyerno? Kun mao kana pagbaton og kaulaw. Kun dili ang gobyerno, samot nang mauwaw ka.

Kun nabasa ni Customs Commissioner Rufino Biazon kining akong lindog o ba kaha sa iyang mga sakop nga makasabot ning pinulongang atong gigamit mas maayong mohimo siya og pakisusi mahitungod ani ug sayron kun si kinsa kining hepe nga atong gihisgotan dinhi. Ang pangalan ning maong hepe wala na kinahanglana nga ato pang hinganlan tungod kay mailhan ra dayon ninyo siya pinaagi sa pagpangutana sa taga Edies Hotel.

Kining tawhana ang unaha og kuha Commissioner kun gusto gyod kang manglimpiyo sa Bureau of Customs kay wala ni magtrabaho para sa gobyerno, ayaw hilabti nang nanginabuhi og tinarong ug mitabang sa inyong operasyon.