Tinuig nga milagro

Magsugod nang tibuok semana nga libreng operasyon alang sa mga pasyente nga may bitas sa ngabil ug lungag sa lingagngan karong Domingo. Ang makapahimus nga mga pasyente nga kasagaran mga kabos ug di makaabot sa dagkong bayranan sa mga tambalanan gikan sa Sugbo ug kasilinganang mga lalawigan.

Niabot og dul-an sa duha ka gatos ang nakaparehistro alang sa tinuig nga kalihokan sa Kiwanis Club of Cebu, Operation Rainbow Australia, DYAB Abante Pa Bisaya! nga magsaulog sa iyang ika-18 nga anibersaryo karong Hunyo ug sa ABS-CBN Cebu nga tibuok tuig nga nagsaulog sa iyang ika-25 nga anibersaryo.

* * *

Di ang tanang nakaparehistro ang ma-operahan. Ipaubos pa sila og medical screening karong Domingo sa buntag sa Cortes General Hospital sa kinapusoran sa Dakbayan sa Mandaue. Nga mao say pahigayonan sa libreng operasyon hangtod karong Sabado, Hunyo 1. Ang screening pangunayan sa mga doktor gikan sa Australia nga nangabot na sa Sugbo alang lang ning kalihokan.

Susihon atol sa makuti nga screening ang kahimtang sa panglawas sa mga pasyente (ang mga may balatian di haom nga ipaubos ning major surgical operation) ug ang ilang pangedaron (kinahanglang di momenos sa unom ka buwan ug di molapas sa siyam ka tuig ang mga may lungag sa lingagngagan).

* * *

Unahon pag-opera ang mga pasyente nga gikan sa gawas sa Sugbo. Kini aron nga di sila mahasol pagpangita og mga pinuy-anan dinhi sa Sugbo ug mas daling makabalik sa ilang mga pinuy-anan human sa operasyon.

Nipasalig hinuon silang Steve Hann, Flor Streegan ug ubang Kiwanians nga tagduma sa proyekto nga, sama sa nangaging katuigan, may giandam silang kasamtangang mga pinuy-anan sa mga pasyente samtang magpaabot sa ilang turno nga ma-operahan. May giandam silang pagkaon alang sa tibuok lugway nga pagpabilin sa mga pasyente dinhi. Nagtigom sab sila og igong gidaghanon sa mga duwaan alang sa gagmay’ng bata aron nga di laayan sa di pa ug human sa libreng operasyon.

* * *

Usa ni sa mga proyekto nga angay’ng pasidunggan ug dasigon nga magpadayon. Mga lokal ug langyaw’ng mga doktor ug ubang mga boluntaryo sa proyekto nipasabot nga ang labing dakong tinubdan sa ilang kalipay mao ang dakong kausaban nga mahitabo sa mga pasyente, mabata man o madagko, inigkapilot na sa bitas sa ilang ngabil ug lungag sa lingagngagan.

Ang katam-is sa pahiyom sa mga pasyente human sa operasyon igo nang makahupay sa kakapoy sa mga boluntaryo ug sa kadako sa ilang gasto ning tinuig nga proyekto. Gikan sa mga panagway nga napuno sa kaikog ug kauwaw, ang mga pasyente ug ilang mga kabanay makaangkon og bag-ong kadasig sa pagpakabuhi ug pangandoy sa mas sanag nga ugma. Matud sa mga tigpasiugda paningkamotan nilang mapalapdan pa kining tinuig nga milagro.

* * *

Email: [email protected].