Sa adlaw sa pagbukas sa klase

Dili na kapugngan ang pag-abot sa adlaw sa pagbukas sa klase nga gikatakda karong Hunyo 3 niining tuiga nga maoy hinungdan nga ang mga ginikanan ug  ang Department of Education (DepEd) maoy ilang gihimo ang pagpangandam sa pagsiguro nga matubag daan ang mga panginahanglan sa mga tinun-an sa  adlaw sa bukas sa klase sa ilang tulunghaan.

Ang mga ginikanan sa mao nilang pagpangandam maoy ilang pagahimoon ang pagpamalit daan og kahimanan sa motungha nilang kabataan nga naglakip sa notebook, lapis, ballpin, libro, bag   ug ingon man ang dakong kantidad nga salapi nga ibayad alang sa matrikula.

Ang DepEd sa ilang gihimo usab nga pagpangandam maoy ilang gihimo ang pagpasiugda og kalihokan nga gitawag nila og “Brigada Eskuwela” nga ang tuyo mao ang pag-andam daan sa tulunghaan nga naglakip ang pagpaayo sa mga nangaguba nga lingkoranan, pag-ilis sa buslot na nga atop sa ilang mga lawak saringan ug daghan pa.

Bisan kun higpit ang gihimo nga pagpangandam sa kadagkoan sa publikong tulunghaan alang sa pagbukas sa klase dili lang gihapon kalikayan nga motumaw ang suliran sa panahon na sa adlaw sa klase nga naglakip na ang kakulang sa mga lawak saringan nga mosangko na hinuon sa pagsinardinas sa kabataan sa ilang lawak saringan.

Matud pa nila nga dili kalikayan ang pagdasok sa kabataan nga motungha sa publikong tulunghaan alang karong tuiga tungod kay sa nasinati nga pag-usbaw sa matrikula sa mga pribadong tulunghaan maoy gihimo sa mga ginikanan ang pagbalhin  sa pagpatungha sa ilang mga anak ngadto sa tulunghaan nga ubos sa pagpadagan sa kagamhanan.

Dugang pa nila nga kining maong suliran maisip lamang nga kabahin sa uban pa nga mga suliran nga nagkinahanglan nga masulbad sa mga nagdumala sa publikong tulunghaan nga usahay mataligam-an sa paghatag og pagtagad.

Naglakip niini mao ang pagsiguro sa mga nagtungha nga kabataan sa publikong tulunghaan nga kalikayan ang grupo sa mga batan-on nga makasulod sa matag tulunghaan ang mga dautang grupo sa mga batan-on nga makahatag og kadaut sa maayong kaugmaon sa kabataan nilang nagtungha.