Mapiksan sa kaayohan sa province of Mactan

Ang laraw sa bag-ong napiling kongresista sa lone district sa Lapulapu nga si Aileen Radaza paghimong bulag nga probinsiya sa Mactan nakasugat og mga pagsaway kay lagi lain na usab kining suway pagduso og “Sugbuak.”

Wala gyu’y mouyon nga ang usa ka lugar mobulag sa gigikanan niining lokalidad, ilabi na kun sama sa isla sa Mactan nga hilabihan kamalambuon tungod sa pagsulbong sa ekonomiya niini bunga sa malampuson nga programa sa turismo.

Apan kun ang pagbuak sa Sugbo magdulot og dugang kaayohan sa ekonomiya, turismo, trabaho ug politika sa mobulag nga lugar nga makatakod ang pagkamalambuon niini ngadto sa silingan niining probinsiya, nganong ato man did-an?

Sa Amerika, ang ginikanan dili magmakuli pagbuhi sa ilang anak nga mag-edad og 18-anyos kun kining maong buhat magdulot og kaayohan sa bata. Kun pig-otan ang Lapulapu sa ilang tinguha, makadulot ba kini og kaayohan sa Sugbo? Kun molambo ang ekonomiya sa Lapulapu, paigo ba ang gidaghanon sa ilang mga trabahante pagpanubag sa kinahanglanon unya sa mga hotel, beach resort, restaurant ug malls? Pila ka libo ka mga trabahante karon ang nanarbaho sa Lapulapu apan dili mga residente sa Lapulapu.

Kun maapil kita og kabulahan sa paghimong probinsiya sa Mactan, nganong dili man nato sila pasagdan?

Undangon na lang nato kining crab mentality. Ang maayo hinuon, lili-on nato ang Lapulapu giunsa nila pagpalambo ilang lokalidad.

* * *

Wala pa gani mahuwasi sa bun-og ang mga pildero ug wala pa gani mahupay ang kalipay sa mga nakadaog, sa miaging Mayo 13 nga eleksiyon, naghisgot na usab kita og eleksiyon. Ning panahona, sa barangay.

Si Comelec chairman Sixto Brillantes mismo ang misugyot nga i-oktaba kini ngadto sa sunod tuig o sa 2015, nga nakadawat og lainlaing reaksiyon. Adunay miuyon nga i-postpone kini. Siyempre, kadtong mga incumbent barangay officials nga nakapamati nga mapilde kun adunay eleksiyon sa barangay, malipay iyawat ma-inat og gamay ilang termino ug makapangandam unsaon pagdaog pag-usab. Samtang kadtong medyo modaog uyon nga eleksiyonon sa dali nga panahon.

Adunay mga politiko nga ang basehan sa ilang kalapad sa ilang gahum mao ang gidaghanon sa mga kapitan ug opisyal sa barangay nga anaa sa ilang puder.

Kun sa ilang pamati ning mga politikoha nga angay nilang duwaan og sayo ang mga barangay, ila gyud iduso nga mag-eleksiyon. Aron andamon daan ilang hugpong alang sa 2016 nga eleksiyon.