Nganong midaug?

Daghan ang naglisud pagtoo nga ang mga ilado kaayo nga politiko sa Sugbo, sama nila ni Kongresista Eddie Gullas, Pablo Garcia ug Tomas R. Osmeña, nangapilde man sa ilang kontra atul sa miaging eleksyon.

Kabahin ni Tommy, makaingon ko nga pareho sila si Mayor Michael Rama nga lig-on nga kandidato apan nakabentaha si Mike kay anaa siya sa administrasyon.

Ang pagpang-aspalto sa daghang mga karsada nga gihimo sa Department of Public Works and Highways (DPWH) nakatabang kaayo sa kandidatura ni Mike kay nagtoo man ang mga tawo nga ang naghimo niini mao ang kagamhanan sa dakbayan.

Nakabantay ba kamo nga pwerteng sinawa sa daghan nato nga mga karsada dinhi sa dakbayan nga hangtud karon nagpadayon pa gani sa ilang trabaho, ubay-ubay niini mga DPWH Project.

Natural sagitsit lang ang mga sakyanan nga moagi niining maong mga karsada ug ang mga tawo makadayeg ni Rama kay nagtoo man sila nga proyekto kini sa dakbayan sa Sugbo.

Ikaduha, ang gipasiugdahan ni Rama nga “Let There Be Light Program” nakatabang kaayo sa iyang kadaugan. Ang maong proyekto nagpahimo nga sayon sa pagkuha og electrical permit gikan sa City Hall kay imbis kuti-kutihon pag-ayo, mihimo si Rama og Executive Order nga ang City Administrator ra ang mopirma sa pag-isyu og permit.

Kaniadto gud, pastilan, kun dili imo ang yuta ug ang imong balay gitukod nga walay building permit, maglisud ka pagkuha og electrical permit gawas lang kun mobayad ka’g dakung kantidad sa mga fixer diha sa OBO.

Kapin sa 10,000 ang nakabenepisyo sa Let There Be Light program nga nagpadayon pa hangtud karon. Mao kini ang mga pamilya nga nakabenepisyo, mibotar g’yud kang Rama ang kadaghanan.

Nakatampo kini sa kapin sa 6,000 botos nga labaw ni Rama kay kang Tommy. Mao bitaw nga akong gitan-aw nga kun duna pa’y mga politiko nga mitrabaho aron makonektahan usab og tubig kadtong wala pay koneksyon sa MCWD, modugang pa kini nga dumadapig.

Sa bahin ni Pabling, layo ra kaayo niya si Caminero nga nagsugod pagka mayor sa Argao. Apan nagtoo ko nga si Pabling ug ang iyang anak nga si Pablo John, nga napilde usab pagka gobernador, apektado sa pagpalit ni Gwen og yuta sa Naga nga anaa ilawom sa dagat.

Kabahin ni Gullas, mora’g gitan-aw nila ang giingong kamatinabangon sa iyang kontra nga matud pa nagpalit gani gayud og kaugalingong ambulansya aron nga madala dayon sa ospital kadtong mga  kabus nga walay kasakyan dayon.

Ingon niana ang panerbisyo sa kagamhanan.