Tul-ira ang hiwi mayor

Angay’ng tul-iron ni Mayor Michael Rama ang hiwi. Ang gipasabot nako nga hiwi mao ang pag-angkon sa magtiayong Abraham ug Mely Desamparado ingon man sa laing negosyante og daghang tindahan diha sa Taboan Public Market.

Usa kini ka dakung pagpangabuso kun tinuod man ang gisulti ni Market Administrator Raquel Arce nga ang magtiayong Desamparado nakaangkon og lima ka stalls kon tindahan ingon man ang usa ka Maritess Mercado nakaangkon usab og tulo.

Ang lagda sa Market Authority mao nga kadtong kwalipikado nga moukopar og tindahan usa lang gayud ang ipagamit kanila ug dili kay duha, labaw na nga dili tulo ug dili lima.

Samtang ang uban naglisud pag-angkon og tindahan apan naunsa ba nga ang magtiayong Desamparado nakaangkon man og lima ka tindahan. Ngano man kini? Kinsay nagtugot nga makaangkon sila og lima ka tindahan?

Abi kay kapitan man si Desamparado sa San Nicolas Proper hatagan siya og lima ka tindahan? Alang kanako isip kapitan sa barangay angay nga si Desamparado magsilbi unta nga ehemplo nga makiangayon siya ug dili mamentaha.

Ang pagdumili nila nga ma-renovate ang ilang mga stalls nagumikan sa ilang kahadlok ug kabalaka nga basin og dili na sila hatagan sa susama nga gidaghanon sa mga tindahan.

Lauman nako nga imatuod ni Mayor Michael Rama ang iyang pagkatarung nga opisyal pinaagi sa pagtul-id sa maong hiwi nga binuhatan.

* * *

Maayo kay ang Office of the Building Officials (OBO) pinaagi ni Cebu City Engineer Kenneth Carmelita Enriquez miisyu na gayud og “stoppage order” nga nagpahunong sa Cebu Port Authority sa pagtukod nila’g koral duol sa Compania Maritima.

Ang hinungdan niini mao nga walay construction permit ang CPA sa pagtukod nila og koral nga giapil pa ang karsada nga kaniadto giila nga mao ang Quezon Boulevard.

Unya, pagkadakung sayup sa pangangkon sa mga abogado sa CPA nga wala kuno’y panginahanglan nga molukat pa sila’g construction permit kun magtukod sila og mga infrastructure project.

Wala gayud kini masubay sa lagda nga gilatid sa National Building Code of the Philippines nga bisan ang mga opisina ug ahensya sa kagamhanan kinahanglang molukat og construction permit kun magtukod sila og project.

Espoko mo nga apilon man nila pagkoral ang karsada? Unsa kamo maoy tag-iya sa karsada? Wala mo kuyafi? Gusto usab nga mahibaw-an sa OBO kun unsa gayud diay nga proyekto nga gustong mugnaon sa CPA diha sa dapit nga gusto nila nga koralon.