Vox populi, vox Dei

Daghang ilhadong ngalan sa politika ang napukan niadtong piniliay sa Mayo 13. Ang lubasang mga pulitiko sama kang Kong. Tomas Osmeña (Cebu City south district), Kong. Eddie Gullas (1st district), Kong. Pablo Garcia (2nd district), Toledo City Mayor Rudy Espinosa, Daanbantayan Mayor Malou Loot, ug uban pa giparot sa ilang mga kaatbang.

Dili kaayo nako matugkad kun unsay tinood nga hinungdan sa ilang kapildihan apan nagpakita kini nga ang tanan adunay kinutuban. Walay gitawag nga bottomless pit. Subo lang palandongon nga ang taas nga katuigan sa panerbisyo niining maong mga politiko natapus lamang sa humbling experience nga mao ang kaparutan.

Vox populi, vox Dei (The voice of the people (is) the voice of God), busa ato na lang dawaton ang atong gidangatan ug dili na unta kita mohimo pa og daghang katarungan aron pagprotesta.

Makighiusa kita uban sa mga mananaug aron sa pag-ugmad sa atong pinalanggang dapit. Atong balikan ang politika unya na sa tuig 2016.

* * *

Daghang nangutana kun unsay akong pangagpas sa kapildihan ni Kong. Osmeña kang Mayor Mike Rama.

Sa akong ubos nga pagtoo, ang mga molupyo sa Cebu City nakaayon sa mga proyekto ni Mayor Mike sama sa: paglimpiyo sa kasapaan ug mga imbornal; pagbutang og kadalanan sa kabukiran ug sa mga dapit diin nagpunsisok ang kabalayan sa urban areas; paglimpiyo sa Carbon market labi na sa mga dalan nga naglibot niini; pag-ayo sa kadalanan sa kabukiran ug sa North Reclamation area nga mora nag lunangan sa kabaw; ug paghatag og maayong pagtagad sa mga senior citizens ug sa people with disabilities (PWDs).

Labaw sa tanan mao ang pagkadaling duolon ug estoryahan sa mayor. Walay mahadlok motimbaya ug mosumbong sa iyang problema ngadto kang Mayor Rama bisan kun asa nila kini masugati.

Kining batasan sa mayor nga makighuyhoy bisan sa mga kabus maoy nakapaduol kaniya sa kasingkasing sa masa.

 Mao kini ang dakung sekreto sa kadaugan ni Mayor Mike Rama!

* * *

Akong awhagon ang tanang bag-ong mananaug nga mag-andam na sa ilang mga prayoridad sa ilang paglingkod unya sa katapusan sa Hunyo.

Ang mga napili pag-usab kinahanglang mo-review kon mohimo’g assessment sa ilang mga nabuhat ug mga wala mabuhat.

Dinhi nila masayri ang nakuwang nilang serbisyo sa nilabay’ng termino o kaha kinahanglang rebisahon kon usbon alang niining mosunod nga tulo ka tuig.

* * *

Email: [email protected]