Ang alcohol abuse

Lahi  kini sa alcoholism. Kini tungod kay adunay mga linugdangan kining maong balansayon sa pag-inom sa mga ilimnong makahubog. Kini naglangkob ning mosunod:

a. Dili makahimo sa mga bulohaton o tahas nga mga trabaho diha sa tunghaan o trabahoan.

b. Kun makainom ang molambigit gayud sa mga lihok nga makuyaw kun delikado sama pananglit sa pagmaneho og sakyanan nga lasbag o hubog.

c. Malambigit sa mga problema sama pananglit sa pagpasakit sa ubang mga tawo o dili ba kaha nadakpan nga nagmaneho og sakyanan nga hubog.

d. Padayon gihapong moinom bisan pa man kun nakabaton na og mga sulirang relasyonal nga niresulta gumikan sa paghubog-hubog.

Ang timailhan ning maong problema

Mahimong tubagon sa hingtungdan kining mosunod nga mga pangutana:

1. Tinguha mo ba nga putlon na gyud unta ang maong bisyo sa naghinobrang pag-inom?

2. Bation mo ba ang kalagot kun ugaling dunay mga tawo nga mobadlong kanimo sa paghunong na sa maong buhat?

3. Nalain ka ba o gibati og kaulaw sa imong kaugalingon sa matag higayon nga ikaw moinom ug nahubog?

4. Moinom ka ba matag buntag aron mamahimong ganado ang imong adlaw? Sa laktod gihimo mo ang pag-inom sa sayong kabuntagon ingon nga imong naandang ritwal bisan kun nahubog ka na sa nilabay’ng gabii?

Kun oo ang imong tubag ning maong mga pangutana, posible nga aduna kay problema nga alcohol related. Mas maayo nga moduol ka og mga tawong makatabang kanimo sa pagpamalandong kun anaa ba gyud ang maong problema sa alcohol.  --Sumpayan pa