Daghan ang kauban nga wala magkuyog

Sa natad sa politika  maoy namatikdan ang mga kandidato nga kauban  nga wala magkuyog ang mga tinguha kay nag-iyahay man sa pagpaningkamot sa ilang kadaugan nga mosangko na gani sa pagtumaw sa mga intriga sa matag usa kanila samtang nagkaduol na ang mga adlaw sa 2013 mid-term election.

Nasinati kining maong kahimtang sa tanan nga kandidato gikan sa pagka senador ug hangtod na sa mga konsehal sa dakbayan o lungsod dinhi sa nasud sa tumong ug tinguha nga masiguro lamang ilang kadaugan.

Matud pa nila nga adunay mga kandidato nga senador nga ubos sa mga dagkong partido nga nag-ilogay sa pag-angkon sa kadaugan nga ang iyang kaugalingon na lamang ang ikampanya sa pagsiguro sa iyang kaugalingon.

Dugang pa nila nga kining maong kahimtang ilang namatikdan bisan sa mga kandidato sa pagka konsehal nga maoy nagpalig-on sa kamatuoran nga dili lang ang kandidato sa pikas partido ilang mga kaatbang kun dili lakip usab diay ang mga kandidato nga ilang kauban og partido.

Gitataw hinuon nila nga sagad kini masinati sa mga kandidato nga naningkamot nga mahimong  number 1 sa mga modaug nga kandidato sa pagpangandam sa kaugalingon sa mosunod pa nga piniliay nga pagahimoon.

Gumikan sa maong kahimtang sa miaging 2013 mid-term  election  daghan na karon ang nakapanglantaw nga ang nagkauban sa usa lamang ka partido nga nakaangkon og kadaugan mao usab unya ang higpit nga magkaatbang sa 2016 election.