Political maturity
Human na ang eleksyon, naproklamar na ang sagad sa mga mananaog, gawas lang sa mga dapit nga dunay problema ang compact flash kon CF cards sa mga Precinct Count Optical Scan machines.
Hinaot nga nakadawat na ang mga pilderong kandidato sa resulta ug mopadayon na sa pag-irog sa unahan ug motabang sa mga napili nga mga opisyal aron mas mapalambo pa ang serbisyo sa katawhan.
Nindot ang panag-ingnan nga gihatag ni Kongresista Eduardo Gullas sa unang distrito sa lalawigan. Bisan sakit ug hangtud karon lisud pa’ng tuohan nga siya, usa ka higante ug beterano sa politika, gipildi sa kandidato nga sulod sa pipila ka higayon gipildi sa mga kandidato nga iyang gipaluyohan, apan sa dakong pagpa-ubos gidawat ug giangkon ni Gullas ang iyang kapildihan batok ni Talisay City Mayor-elect Johnny V. delos Reyes kun mas naila sa angga nga JVR.
Ang gihimo ni Gullas nga pag-angkon og kapildihan timailhan sa iyang “political maturity.†Daghan man gud sa atong mga politiko, labi pa gyud kadtong gikan sa usa ka Dynastiya, ang dili gyud makadawat sa ilang kaparotan.
Hinaut sundon sa ubang mga pildirong kandidato ang gihimo ni Gullas. Kun ingon niini ang tanang kandidato, tingali mas hapsay ang eleksiyon sa Pilipinas.
* * *
Ang bag-o lang nahuman nga eleksyon niusab sa kamada sa mga lider sa politika sa Sugbo. Ang kaniadtong giila nga mga gamhanang lider sa politika sa Sugbo hinay-hinay nga nangapapas.
Kun way milagro nga nahitabo sa PCOS machines ug ang tinuod gyud nga kabubut-on sa katawhan ang mipatigbabaw sa eleksyon niadtong Lunes imong makita ang dakong kausaban sa kinaiya sa mga botante.
Nahanaw na ang kaniadto nga batasan sa pagka-fanatic sa katawhan alang sa usa ka politiko nga bisan ibala pa sa kanyon makipatay gyud alang sa usa ka kandidato nga dili magsapayan bisan unsay isyu.
Bisan hinuon sa kaparotan sa ubang mga higante sa politika dinhi sa Sugbo apan dili pa hingpit ang ilang pagkapukan, daku pa gihapon ang purohan nga sila mobalik sa sunod nga mga higayon, tungod kay mayoriya sa ilang mga kaalyado nidaog gihapon sa eleksyon.
* * *
- Latest
