Ang atong ngipon

Sagad kanato nahibalo na sa kabililhon sa atong ngipon apan kulang sa kahibalo sa pag-alima niini, nga usahay mosangpot sa hilabihang kahasol kun kini madaot o magsakit. Ang atong ngipon kun dili maatiman pag-ayo, inanay mangadaot kay mogabok man o mangapudpod tungod kay nadutlan sa mga daut nga bakteria.

Matud sa mga eksperto, gikan sa 1 ngadto sa 7 anyos ang edad, adunay moturok mga temporaryong ngipon. Og inig-abot lapas 7 ngadto 15 anyos ang edad, mopuli na ang permanenteng  32 ka ngipon lakip na ang 4 ka bano-ok o wisdom tooth nga nagtimaan nga angay na atimanon ang kahimsog sa ngipon.

Sa atong inadlaw nga istilo kay lagi bisi kita sa atong mga gimbuhaton, inighuman sa oras sa tingkaon, dili na magtagad sa mahimong epekto sa ngipon. Kadakaon nato, diha pa lang sa baba nahumol na sa natural o kemikals nga asido gikan sa inusap nga mopahumok sa kasinaw o proteksyon nato sa ngipon.

Busa palabya ang 15 ngadto sa 30 minutos, sa di pa mag-toothbrush, aron di mahilis ang lining nga maoy depensa sa mga bakteryang modaut sa ngipon.  Kun mahimo gamita ang dental floss o hilo inay magtooth-pick, aron di mahilis modako ang kiki o kal-ang sa punoan sa ngipon, diin mokotkot ang bakterya.

Sagad sa toothpaste karon, fluoride ang gigamit nga cleansing nga mobaid aron moputi ang ngipon apan nahilis ang proteksyon ini. Pangita og bio o herbal toothpaste nga may sambog nga  ginger, neem leaves, green tea, ug ubang herb natural cleansing. Ang himsog nga ngipon, sinawon ug perlas tan-awon.

Ang atong mga dentist o doctor sa ngipon, aduna nay mga modernong teknolohiya sa pag-atiman sa ngipon. Bisitahi silang mga modernong dentist nga kanunay nagtoon sa kaugmaran sa binag-ong paagi sa pag-atiman sa ngipon. Duawa sila bisag kausa sa usa ka tuig, aron matan-aw ang ngipon mo.

Basta magkugi ka lang pag-asikaso sa ngipon mo ug kanunay magtoon usab unsay ikaayo sa ngipon, sigurado kita nga dunay permi nga kompleto og himsog nga ngipon. Kun ugaling magsakit ang ngipon mo, ayaw ipaibot kun dili ipa-root canal o ipapatay ang nerve aron permi di kana batio’g kasakit bisag mapudpod pa.

Sa kanhiay panahon, way sepilyo ang mga tawo kun dili mag-usap lang og mga dahon apan lig-on ug sagad nila kaniadto kompleto, way kadaot sa ngipon.