Ang usa ka gatus ka adlaw sa katungdanan

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Nahingpit na gayod ang gipahigayon nga 2013 mid-term  election ug gipakita sa katawhan ang ilang suporta ngadto sa mga kandidato nga ilang gituohan nga makahatag kanila og maayong serbisyo publiko pinaagi sa ilang paghatag og lig-ong suporta sa ilang kandidatura nga maoy naghatod sa dili malalis nilang kadaugan.

Ang nakaangkon sa kadaugan sa ilang kandidatura maoy masinati ang pagsaulog sa kalipay apan ang mga kandidato nga nakaangkon sa ilang kaparutan  daw mobati usab og kasubo sanglit wala man gayod makakuha og lig-ong suporta sa katawhan  ilang kandidatura nga naghatod niini sa iyang kaparutan.

Sa  mga molingkod sa katungdanan maoy gipaabot sa mga tawo  ang ilang matinud-anong pagtuman sa ilang mga gisaad nga serbisyo sa panahon sa ilang pagpangampanya nga nakapadani sa mga tawo nga maoy hinungdan nga gisuportahan ilang kandidatura.

Ang pagpakita sa kakugi sa pagserbisyo sa pagsugod sa pag-asumer sa katungdanan sa mga piniling opisyal maoy sugdan sa pag-ihap ang mga adlaw sa paghupot sa katungdanan ug sa paglungtad sa  usa ka gatus ka adlaw  sugdan usab sa pagkuwentada ang kalampusan sa pagtuman sa ilang kaakohan

Ang mga proyekto ug mga programa nga gipatuman sa mga naglingkod sa katungdanan  sa hinayhinay mosihag ang gikahatag niining kaayohan sa katawhan nga magsilbing sukdanan sa pagpadayon pinaagi sa pagpasubli sa 2016 nga piniliay.