Mga hinungdan sa pag-inom

Nagkadaiya ang mga hinungdan kun nganong ang tawo moinom og bino o ilimnong makahubog. Ania ang mga nagkadaiyang aspeto nga angayan natong tan-awon.

1. ASPETONG PISIKAL

Ang atong lawas aron mamahimong himsog ang nagkinahanglan usab og alcohol apan sa paagi gyud unta nga balanse. Apan lagi gumikan sa nasinating tensiyon, ang uban moinom og bino aron pagpakalma sa maong tensiyon. Ang uban moinom gumikan sa panghunahuna nga kinahanglang hilison sa bino ang ilang gikaon. Sama pananglit ang pagkaon og inasal nga baboy o bisan unsang karne. Hilison lagi kuno apan kun atong tan-awon ang bino nga angay’ng imnon sa paagi nga kasarangan ang nahimo na man hinuong tinubigon kay matud pa nila Beer is food!

2. ASPETONG SIKOLOHIKAL

Matag usa kanato adunay nasinating mga problema. Ang bisan unsang problema ang nakahatag og kasakit sa matag usa kanato ug nakaumol og mga pagbati nga dili maayo sama pananglit sa frustrations, low self-esteem, ug pagkawalay gana sa kinabuhi. Ang hinanaling reaksiyon sa hingtungdan mao man gyud ang pag-ikyas gikan sa maong mapait nga kahimtang. Ang uban pinaagi sa drugas samtang ang uban pinaagi sa bino. Pinaagi sa pag-inom ang uban makahimo og mga butang nga dili nila mahimong himuon kun anaa sila sa normal nga kahimtang. Ang uban makasulti sa angayan nilang isulti kun sila makainom. Ang uban nahimong usa ka mood changing drug alang kanila nga nakasinati og emotional deprivation. Kay diha sa pag-inom ang uban “nakatuman” sa wala matuman nilang mga pangindahay kanhi. Apan sa gihapon kun mahuwasan na, balik lang gihapon sa problema.

3. ASPETONG SOSYAL

Nahimong kabahin sa kultura sa katilingban ang pag-inom sa ilimnong makahubog. Kun dunay mga panagtigom bisan asa, pormal man o dili pormal nga mga kalihukan dili gyud mawala ang pag-inom og bino. Dugang pa, ang anaa sa mga panimalay kang kansang mga miyembro ang manginomay ang dunay dakong posibilidad nga makaaghat sa mga kabataan nga moinom usab. Dugang pa, ang pagtuo sa kadaghanan nga ang tinuod nga lalaki kinahanglang moinom gyud ang nahimong hilo nga ikamatay alang sa atong mga kabataan karong mga higayona. -- Sumpayan pa