Last will nga sinuwat lang sa kamot ug way mga testigo makonsiderar bang balido?

Ang atong balaod adunay gilatid nga mga rekisitos aron mamahimong balido ang usa ka Last Will and Testament nga hinimo sa usa ka tawo. Apan sukwahe sa ubang nasud nga automatic mo-epekto ang Last Will and Testament  kun mamatay na ang testator, dinhi sa Pilipinas ang Last Will and Testament kinahanglan pa nga ipa probate o pa-aprobahan sa Korte una kini ikapatuman. Unsay maayo nimong buhaton kun ikaw gibinlan og kabtangan pinaagi sa usa ka will? Makonsiderar ba nga balido ang will nga handwritten ug way mga testigo? Kana nga pangutana ang atong tubagon karon sa atong column.

* **

Dear Atty. Devine,

Have a nice day! Sa pagkamatay sa akong papa didto sa Mindanao dunay gihatag nako akong mama nga usa ka sulat  gikan sa akong amahan gisulat niya kini before siya namatay usa ka short bondpaper iyang gisulatan nga ang iyang kabilin nga iyang nasunod gikan sa iyang ginikanan iyang gisalig o gibilin nako nga walay bisan kinsa nga makahilabot bisan pa ang duha nako ka igsoon. Iyang  gipirmahan ug gibutangan niya og thumb mark sa ubos. Ang akong pangutana:

1. Kining gisulat sa akong papa matawag ba ni siya nga LAST WILL and TESTAMENT? Mahimo ba ni nga Legal bisan walay witness nga nipirma?

2. Unsa man akong buhaton para mapamatud-an gyud sa balaod nga siya gyud ang naghimo ug nagsulat niini kay wala may bisan usa ka  saksi sa iyang pagbuhat ani nga sulat.

3. If mahimo kining Legal, asa pud ko dapit nga modangop ani para makatabang o makagiya nako?

Hinaut nga imong matubag kini akong mga pangutana…… Daghang Salamat.— Edman F. Pinamungajan, Cebu “

* * *

Dear Edman,

Basi sa atong balaod, adunay duha ka paagi sa paghimo og Last Will and Testament. Ang usa mao kining Last Will and Testament nga notarized ug adunay tulo ka mga subscribing witnesses samtang ang usa mao kining gitawag og Holographic Will. Kining Holographic Will  basi sa Article 810 sa Civil Code  of the Philippines kinahanglan sinuwat mismo sa kamot sa nag-execute, adunay petsa ug kinahanglan adunay pirma sa naghimo. Wa na magkinahanglan og testigo ang paghimo sa Holographic Will. Busa kanang gihimo sa imong papa kun nakatuman kana sa tanang rekisitos sa balaod makonsiderar kana nga Holographic Will. Apan  dili automatic ang pagpatuman niana kay basi sa atong balaod ang Holographic Will kinahanglan pa nga ipa probate sa Korte. Buot ipasabot nga ikaw kinahanglan pang mopasaka og petition sa Korte aron ipa-approve ang maong will ug atol sa pag-probate niini, kinahanglan kang mopresentar og usa ka testigo nga familiar sa handwriting sa imong papa ug familiar sab sa iyang pirma. Kun pananglitan adunay mosupak sa maong will ilabi na kay ang imong duha ka igsuon wa ilakip niini, kinahanglan kang mopresentar sa korte og  dili mominus tulo ka mga testigo nga familiar sa handwriting ug signature sa imong papa. Kun wa kay makuha nga testigo mamahimo sab ka mga mopresentar og expert witness. Busa ang maayo nimong buhaton karon mao ang pag-adto og abogado aron imong ipa probate ang Holographic Will sa imong amahan ngadto sa Korte.

Hinaut nga akong natubag ang imong pangutana. Daghang Salamat and God Bless.  — Atty. Divine

Alang sa inyong pangutana, ipadala lang sa Legal Corner sa Banat News sa V. Gullas Street, Cebu City  or email sa [email protected] ug akong tubagon ang inyong pangutana pinaagi sa akong column matag adlaw’ng Miyerkules ug Domingo.