Pilia ang makamao

Ugma na gayud ang eleksiyon. Usa kini ka importante nga adlaw gumikan kay ato na usab nga gamiton ang atong katungod sa gawasnong pagpili sa atong mga opisyales kinsa modumala sulod sa laing tulo ka tuig.

Daghan ang maghugop sa presinto gikan sa alas siyete sa buntag ngadto na sa alas siyete sa gabii. Ug angay natong hinumdoman nga ato lamang iboto ang kandidato basi sa diktar sa atong konsensiya.

Kabahin na sa atong kultura ang pagpamalit og mga boto panahon sa piniliay. Sukad pa sa unang mga eleksiyon, kwarta na ang gipakamang sa ubang mga kandidato aron paghakot og mga boto.  Wala na ang naandang pagpabuhagay sa mga plataporma. Wala na ang mga debate diin atong madungog ang mga plataporma de gobiyerno gikan sa mga kandidato nga mao unta ang basihan sa atong pagpili kun si kinsa kanila ang angay nga sangunan sa katungdanan.

Sa mga piniliay karon, ang linabayay og lapok mao na ang nagdominar sa mga debate. Insulto didto, insulto dinhi. Naanad na ang ubang pulitiko niini. Wala na ang sistema sa pagdani og mga boto pinaagi sa pagplastar sa mga plataporma.     

Ug daghan gihapon ang madala sa silaw sa kwarta. Ug naandan na usab nga kadtong adunay mga salapi mao ang modaug sa piniliay bisan pa man kun wala silay hibangkaagan sa pagdumala sa katawhan.

Karon angay nato nga bag-ohon kining maong sistema. Ug nga kinahanglan atong pilion kadto lamang makamao mokupot sa renda sa maayong serbisyo. Anaa sa kamot natong mga botante ang kapalaran sa resulta sa eleksiyon ugma.       

Tungod niini, dili kita magpadala sa silaw sa salapi niadtong buot molingla kanato pinaagi sa pipila ka libo. Kun dili malikayan, wala man siguroy dautan kun atong dawaton ang gimudmod nga salapi gikan sa mga kandidato.

Apan mas labing maayo kun atong pilion kadtong mga kugihan mosungkit og mga proyekto alang sa tinuoray nga kalamboan. Ug nahibalo na kita kinsa kining maong mga kandidato.