Good luck candidates!

Tan-aw nako ni Konsehal Rodrigo Abellanosa mora’g ang iyang pangangkon nga labaw kaayo siya sa survey batok sa iyang kaatbang nga si Totol Batuhan mora’g duna pay sambog nga kabalaka.

Kun tinuod man ang pangangkon ni Abellanosa nga naglawig ang iyang kadaugan batok ni Totol, nganong kanunay man nimo nga atakehon ang imong kaatbang?

Wala pa gayud makakuha si Abellanosa sa batasan sa iyang kaubang kandidato pagka kongresista sa north district nga wala gayud mohimo’g atake sa iyang kaatbang.

Si Kongresista Raul V. Del Mar maoy tinuod nga naglawig ang kadaugan batok sa unom ka laing kandidato kay wala gayud mobuhi og pulong-atake sa iyang kontra nga pirmi nga miatake kaniya.

Wala panumbalinga ni Del Mar ang pagbalikas kaniya sa iyang kaatbang ug ang pagdaut nga kuno tiguwang na siya kay ang tinuod ang mga botante misamot na hinoon nga ilang botohan si Del Mar.

Ingon unta niini ang himoon ni Abellanosa kun tinuod man ang iyang pangangkon nga lupig g’yud niya’s Totol. Gitug-anan ko sa higala nako sa Iglesia Ni Cristo (INC) nga usa kini sa rason nga si Totol maoy ilang gisuportahan.

Ang tinuod, daghang mga sakop sa media ang nahiubos ni Abellanosa kay giratsada niya nga kadtong mohimo’g kumentaryo batok niya gibayran kuno ni Totol.

Kuyawa gud nimo sir. Dili maayo ang imong pamahayag kay ang resulta ana magpanagana ang mga sakop sa media nga mohimo’g pagsaway nimo kay imo man dayong ingnon nga gibayran ni Totol. Imo ba kining taktika aron dili ka atakehon?

Ayaw iratsada ang tanang sakop sa media. Tubaga lang kun adunay isyu nga malambigit ka sama sa gihimo ni Totol. Ang imong kaatbang igo lang mopadayag sa iyang argumento kun adunay isyu nga siya malambigit.

Magpatuga-tuga gani ta’g sulod sa politika, likayan nato nga masuko dayon.

* * *

Nalipay ko kay ugma, eleksyon na g’yud. Gipul-an na man gud ko nga naminaw nga matag sulod nako sa City Hall, dunay mga alyado sa mayor nga mokomedya dayon nako pinaagi sa pag-ingon “BOPK ka g’yud.”