Adlaw sa pagpanudya

Tulo ka katulog na lang eleksiyon na. Ato nang pilion ang atong 12 ka mga senador, gobernador, bise gobernador, mga bokal, mayor, bise mayor ug mga konsehal.

Niining tungora migrabe na ang black propaganda, paglingla sa mga botante ug diretsahan gayud nga pinalitay og boto.

Makita nato ang mga politiko nga walay kauwaw nga mangilad sa mga botante pinaagi sa ilang mga plataporma.

Mao kining mga botante nga dili gani nila tagdon kaniadto. Kaniadto ila pa ganing patiran ang gipaninda nila sa asiras. Mora sila’g mga ulipon.

Karon maayo na kaayong magpaupoy-upoy ug magpatuo nga sila ang mga suloguon sa lungsod. Kita kuno ang amo. Kahilas no?

Kinahanglang di na kita magpailad niining mga matam-is nga pulong gikan sa hait pa sa labaja nga dila sa mga politikong way laing tumong ug tuyo kun dili mao lamang ang pag-angkon og gahum aron magpadato. Gamiton pa gayud nila ang ilang gahum aron paglutos sa ilang mga kaatbang.

Mao kini ang panahon nga atong ilusad ang malinawong rebolusyon aron pag-ilis sa mga hiwi, inutil ug kurakot nga mga opisyal sa gobiyerno.

Karon mao ang adlaw sa pagpanudya!

* * *

Kining political dynasty, pagpanghasi, pagpangurakot ug ubang binuang sa mga politiko pwede nang mahunong kun maoy imong kabubut-on.

Ang labing epektibong hinagiban nga maoy "moihaw ug molubong" niining mga hiwing politiko mao ang sagradong boto nga imong isulat sa balota karong Mayo 13.

Hinaut pang dili nimo kini ibaligya. Sumala pa sa mga maalamon nga "tukbon ang paon apan iluwa ang taga."

* * *

Nganong pugngan man sa Bando Osmeña - Pundok Kauswagan (BOPK) ang paghimo og dalan diha sa Sitio Bato, Bgy. Ermita?

Samtang mopugong sa kaugmaran sa maong dapit magsul-ob pa gayud sila og t-shirt nga Type O. Wa na ba gayu’y kinutuban kining pamolitika dinhi sa Cebu City?

Ang angayang panaminan sa atong mga konsehal mao ang gihimo sa city hall nga mga dan sa barangay sa Carreta, Tejero, Villa ug ubang mga squatters area nga nasunog.

Di ba nindot ug dali na kaayo kining masudlan sa bombero, ambulansiya ug pulis kun dunay mga emerhensiya?

Mao usab kini ang nahimo sa city hall karon sa Carbon market. Hamugaway na kaayong kaagian ang kadalanan sa maong merkado.

Hunonga na ang pamolitika hinonua tabangi ang city hall nga matuman ang pagbutang og dalan sa Ermita kay mao kini ang makaayo sa mga molupyo sa maong dapit.

* * *

Email: [email protected]