Angay maglipay

Sa mga nakabatyag sa tinuod nga kinabuhi, tingali makaingon kita nga dili lalim mabuhi ning kalibutana. Tungod kay di man gyud nato matanto o mabatonan ang gitinguhang kalipay kun dili mas labi man hinuon mabug-atan sa mga unos o pagsulay nga nakamugnag kagul-anan gumikan sa kasakit.

Dili gayud kita makalikay niini kay mao man gyud kini ang pormula nga dili kita mabuhi kun wala’y pag-antos o pagpanday nga ulayon kang palig-onon ang imong kinabuhi. Aron sukdon ang katakos sa lahutay, sa pakigbisog sa hasmag nga pukanon ang mga pangandoy mong kalipay. Busa magbag-o tag panan-aw.

Kun sa pagtuo mo mora kag gikastigo sa kapalaran, unya hapit kana mobuhi sa imong kusog, ayaw lugaki ang paghago mo kay wa kita masayod nga ang ganting gipaabot mo, pila na lang ka gutlo moabot na. Kun di kana kaantos sa mga kagul-anan, wa ka nay higayon pang makab-ot ang pangandoy nga kalipay.

Unya aron di ka maluya ug makargahan pa ang kusog mo pagsangon sa mga mabug-at nga pas-anon, angay di na nimo panumbalingon. Isipa nga unsa man ang mabati mong pag-antos, himoa kanang katarungan o hagit nga maglipay ka. Bisag gisilsil ang utok mo sa kalalim sa mga suliran, himoa kana nga kalingawan.

Ang hapdos kasakit nga bation mo, timailhan kana sa kahayag sa paglaom. Ayaw lantawa ang gilay-on sa unahan kun di batyaga o aninawa nga kini anaa na kanimong inanay nag kalig-on ang dugokan sa katumanan sa tiunay nga kalipay. Pagmatngon nga di ka matental sa mga mugbong kalipay nga mougtas sa kaguol.

Ang dugokan sa tinuoray nga kalipay mao ang kamatinud-anon sa gugma. May pag-antos nga molahutay sa kasakit. Di igsapayan bisa’g yubiton bation niya ang kaluoy niadtong nagtamay kaniya. Sinsero, ligdong nga i-alagad sa uban ang kaugalingon kay nasayud siya nga may panahon anihon ang gimithing kalipay.

Di mawad-an sa paglaom nga mentras may kinabuhi pa nga gipahulaman sa kahitas-an kanato, angay maglipay kita sa pag-antos ug pagpailob nga mobuhat sa katarong. Ampingan nga matuman ang lagda sa kinabuhi, nga way malipayon nga dili makatilaw og tumang kagul-anan, nga ang sukdanan mao ang lahutay.

Apan dili ikaw makalahutay kun talikdan mo ang tag-iya sa kinabuhi. Wala gayud kitay kahimoan nga mag-inusara nga magbaktas sa dalan sa pamasin.