Tomas-Totol ni Cenon ug gubot sa LP-Lapu

Kinsa kaha ang nagdala og samok sa Liberal Party sa dakbayan sa Lapulapu?

Ang kandidato pagka-kongresista sa LP nga si Angel Rodriguez misang-at og kasong estafa batok sa kandidato pagka-mayor sa LP sa Lapulapu nga si Efrain Pelaez.

Giakusahan ni Rodriguez si Pelaez og ‘misappropriation’ sa P25,000 nga operational funds nga iyang gi-contribute sa partido aron gastuhon sa pagkaon ug uban pang gastuhan sa ilang mga pulongpulong.

Mihatag si Rodriguez og tseke niadtong Oktubre 18, 2012 sa kondisyon nga mag-abli og joint bank account. Apan sumala pa ni Rodriguez nga ang maong kantidad didto gideposito sa personal account ni Pelaez. Sa dihang iya kining gikomprontasi, wala maka-esplikar og tarong si Pelaez.

Apan si Pelaez sa iyang bahin miingon nga dili niya gub-on iyang reputasyon sa P250,000 lamang. Matud niya nga nasuko lang si Rodriguez kaniya sa dihang gitaktak kini ug ang lima ka mga kandidato pagka-konsehal niadtong Marso.

Nasayod ba kaha ang Liberal Party nga gubot pa sa lukot ang ilang mga lokal nga kandidato sa Lapulapu?

Pait kaayong palandungon nga ang partido ni Presidente Noynoy Aquino maguba lamang tungod sa away sa campaign funds sa duha ka lokal nga kandidato.

Nagpakita usab kini nga kun managpakadaog kining mga klaseha sa kandidato, unsa kahay ilang dinad-an sa kuwarta sa katawhan.

* * *

Si kanhi Kapitan Cenon Bacus sa barangay San Nicolas Proper usa ka lunod-patay nga Osmeñista. Alang sa wala makaila, siya kadtong nag-inusarang kapitan nga mibarog alang kang Tomas Osmeña sa una niining pagdagan og mayor sa siyudad Sugbo.

Sa wala pa ang kampanya ning eleksiyona, si Cenon nagsige og kuyogkuyog sa panon ni Tomas, magsige og guest sa programa sa Bando Osmeña Pundok Kauswagan (BOPK) sa usa sa mga estasyonan sa radyo ug bukas kaayong nagkampanya sa kandidatura ni Tomas.

Apan wala pa gyud makapangayo og subay sa among kanhi kapitan sa iyang pagka-Osmeñista karon ug hugot suporta kang Tomas pagka-mayor kontrang Mike Rama, apan sa samang higayon tua mosuporta kang Totol Batuhan pagka-kongresista inay kang Bebot Abellanosa sa BOPK.

Samot nang naglibog ko nganong wala’y Tomas nga mipakgang kang Cenon sa iyang pagkampanya niya (Tomas) pagka-mayor ug Totol pagka-kongresista.

Unsa man kini, ang Tomas-Totol nga pagpangampanya ni Cenon gitugot lang ba diay ni Tomas?

Naglibog usab ko nganong tua si Cenon mosuporta kang Totol nga kumpare man unta sila ni Bebot.

Usa pa, ang kapitan sa Duljo-Fatima nga si Elmer Abella tua usab mosuporta kang Totol nga si Bebot kanhi kapitan man sa Duljo kaniadto.

Nadunggan sa mga higala nako sa Duljo (kay nakapuyo ko sa Duljo og lima ka tuig) nga human sa sunog sa sitio Mecabaja niadtong miaging tuig man tingale to og wala ko masayop, si Totol miduaw sa lugar ug nanghatag og lima ka sakong bugas, mga noodles ug de lata. Wala pakita si Bebot unya wala mohatag og hinabang. Sulti ra hinuon kini.

Apan ang nahibudngan nako nganong ang kapitan karon tua sa pikas mosuporta, wala sa iyang silingan.

* * *

Ning eleksiyon sa sunod Lunes, makit-an nato ang subsob nga kampanya sa mga Katoliko pabor sa mga kandidato nga “pro-life.”

Gani, adunay mga grupo nga bukas kaayong nagsuportahan niining Pro-Life Partylist nga nagduso sa proteksiyon sa pamilya, kinabuhi ug kaminyoon.

Gisalikway niini ang mga party-list, kahugpongan ug mga kandidato nga nagsuporta sa Reproductive Health law, nagduso sa “divorce” ug “same-sex marriage.”

Akong naila-ila ang usa sa tulo ka pro-life senators nga sila si Rizalito “Lito” David sa Kapatiran party. Iyang mga kaubanan silang John Carlos “JC” Gordon de los Reyes ug Atty. Marwil Llasos.

Kining tulo, ilabi na si David, nagduso nga mapalabang ang mga balaodnon nga magsalikway sa political dynasty, pork barrel, RH bill, death penalty, sugal, iresponsable nga pagmina ug logging ug visiting forces agreement.

Hapit ko matuk-i sa kamatuoran nga iyang gisulti nga matud niya sala sa duha ka Osmeña, silang Senador Serge Osmeña ug kanhi Senador Sonny Osmeña nganong mahal ang atong kuryente karon. Silang Serge ug Sonny matud niya maoy naninguha nga mapasar ang Epira law nga maoy nakapahimong mahal sa kuryente.

Silang Serge ug Sonny, sumala pa niya, nagprotehir sa duha ka adunahang apilyedo nga nalambigit sa negosyo sa kuryente.

Si David nagkanayon nga usa kini sa nakapaaghat kaniya pagdagan pagka-senador.