Ang celpon

Kaniadto mapagarbohon na kaayo ang panimalay nga adunay telepono nga ginganla’g landline. Di pa daghan ang nagpataud ani kay medyo malisod ang pagmintinar sa gasto. Gawas pa dili sad ni madala kun ikaw maoy gitawgan kay wa man ta permi sa atong pinuy-anan. Unya magbawo tag pangitag katawagan.

Hangtod miabot kadtong gadyet nga itangkil sa baksanan, nga ginganlag “Pager”.  Murag Mp3 kagamay apan motingog lang nga mora’g ringtone o signal nga nagpahibawo nga adunay tuyo kanimo. Aron dayon ka ka-reply kun anaa ka sa layo, mahasol kag pangita’g telepono nga landline, may lag naa sa imong duol.

Apan karong panahona, ang telepono nga landline mahimo na madala bisa’g asa ka pa dapita sa kalibutan. Apan ang nakalisud lang kun unsay network nimo maura say matawgan. Apan kun mahimo man motawag sa laing network mabun-og ka sab sa gasto. Hinuon may dako ning kapuslanan kun sapian o negosyante.

Tungod sa kahaytik na sa telekomunikasyon, nabuhong na sa kadaghanang Celpon. Naa na tanan ang atong gusto buhaton. Video, tv, radio, camera, mapa, internet, ug uban pa. Duna pay celpon nga wa pa mapagawas sa merkado nga morag plastic lang pil-on isulod sa pitaka. Naa say celpon nga singsing ug relo.

Nahibalo ka ba ngano gitawag ang Filipinas nga “celpon country”? Tungod kay halos tanang pamilya adunay celpon bisa’g bata, tiguwang, makililimos, basurero, kay makatxt kag 24 oras kun may 5-10 pesos kang ilod.  Ang celpon kabahin nas inadlaw nga gimbuhaton bahalag way kaon,  ang lod maoy unahon.

Ang celpon maoy medium karon sa atong komunikasyon, nga bisag asa ka pa nga nahilayo sa mga minahal mo sa kinabuhi, morag anaa ka lang sa kiliran.  Ang tanang kasayurang gusto mo, matubag lang sa celpon. Usa kini ka kahimanan nga magsilbing kaabag sa mga kasayuran nga nanginahanglan dayon og aksyon

Apan gigamit gihapon kini sa mga mapahimuslanon og kamot. Daghang nadaot sa pangilad, pangabusong sekswal, nagkalainlaing raket o bisyo, kagubot sa panimalay ug ubang kalihokan nga ang tumong mao ra gyud ang kasamok.  Pinaagi sa kol o txtanay, kini maoy nakapahulma sa lainlaing katuyoan o motibo. Busa kun may celpon ka, magmatngon sa mga negatibong epekto niini. Iseguro kining magamit sa kaayohan nga di ka mahaylo sa kaanindot sa pasalig nga moguba sa paglaom mo. Basig magsige ka na hinuon nga magkonsomisyon.