Kaso sa mga alyado ni PNoy

Usa sa mga anggulo nga nitumaw dayon human sa pahibawo sa Bureau of Internal Revenue (BIR) nga ilang gikiha og tax evasion ang inilang doktor sa Sugbo nga si Potenciano “Yong” Larrazabal III mao nga kabahin ni sa nagpadayong pagpanggukod ni Presidente Noynoy Aquino sa iyang politikanhong mga kaatbang.

Kay ang mga Larrazabal nakig-atbang sa lokal nga mga kandidato sa Liberal Party sa Ormoc City nga gipangulohan sa magtiayong Kongresista Lucy ug Richard Gomez. Ang mga Larrazabal dinhi sa Sugbo gituohan sab nga nagpaluyo sa lokal nga mga kandidato sa United Nationalist Alliance (UNA) ni Bise Presidente Jejomar Binay.

* * *

Nakahatag og dugang sukaranan sa pasangil ang dungan nga pahibawo sa Department of Justice (DOJ) nga gikiha na sab og tax evasion si kanhi chief justice Renato Corona. Samtang nikabat og P21 milyones nga giingon sa BIR nga utang nga buhis ni Larrazabal, ang DOJ nipasangil nga niabot og P120 milyones nga gitikas nga buhis ni Corona.

Samtang si Larrazabal hingpit nga nakugang sa kasong gipasaka batok niya, si Corona niingon nga nagpaabot na siyang daan sa kiha. Kay si Justice Secretary Leila De Lima usa sa nihatag og testimoniya batok niya atol sa iyang impeachment trial sa Senado sa niaging tuig.

* * *

Si BIR Commissioner Kim Henares nitataw hinuon nga way labot sa politikanhong mga interes ni Presidente Aquino ang mga kaso nga ilang gipasaka. Nipasabot siya sa TV Patrol Central Visayas nga wa nila susiha unsay politikanhong bulok ni Larrazabal kun dili ang dakong kang-a sa iyang gideklarar nga kita ug ang professional fees nga gibayad sa Philippine Health Insurance Corporation (PhilHealth) ngadto niya gikan sa 2009 hangtod sa 2011.

Si Henares niingon sab nga ang kaso batok ni Corona gipasikad sa mga dokumento nga nahipos sa BIR dihang gipangayoan sila og kasayuran sa Senate Impeachment Court. Nga nibisto sa nagkaguliyang nga katigayonan ni Corona.

* * *

Wa mahisguti ni Henares apan modason sa iyang pangangkon nga way pamolitika ang ilang mga kaso sa BIR ang nahauna niyang pagpasaka og kasong tax evasion niadtong 2011 batok sa Sugbuanong negosyante og bugas, si Nilo Alegado, bana sa pangu sa LP sa Consolacion nga si Mayor Teresa Alegado, kansang gitug-an nga kita mas gamay sa nalista sa records sa National Food Authority (NFA).

Sa samang higayon, si De Lima makapanagang sa tulisok ni Corona pinaagi sa pagtumbok sa iyang pagpasaka og kasong syndicated estafa batok sa laing dakong haligi sa LP nga si Mayor Samuel Co sa Pagadian City, kinsa gilambigit sa pangilad sa Aman Futures Group Philippines Inc. Nga gituohang nakapangilkil og binilyon ka pesos gikan sa gatosan ka biktima sa Mindanao ug Kabisay-an.

* * *

 Email: [email protected].