Maayo pang kada tuig mag-eleksiyon

Morag magsige na’g panindot ang kagamhanan sa dakbayan sa Sugbo sa mga dalan sa siyudad  niining panahon nga nagsingabot na ang piniliay. Atong makita nga pipila ka dalan sa dakbayan ang kamulong gitrabaho karon.

Sa downtown area, ang porsiyon sa Junquera Street padulong sa Colon Street ang gipangbungkal. Taud-taud na kini nga gitrabaho. Ang dalang Colon gipanindotan usab alang sa mga motorist.        

Didto sa uptown area, gipangluka ang mga espaltong porsiyon sa Escario Street aron pulihan usab og bag-o. Hinuon daghan ang natingala ngano nga gipangbungkag ang mga espaltong karsada tungod kay maayo pa man kini.

Bisan ako natingala nganong karon ra man kining mga proyekto mitunga nga nagsingabot na ang piniliay. Dili na hinuon nato mawakli gikan sa atong alimpatakan nga adunay bulok sa pulitika kining maong mga proyekto.

Sa laing bahin, grabe usab nga kahasol ang gihatag sa trabaho diha sa Junquera Street. Kini gumikan sa grabe’ng trapik nga dala niini matag adlaw . Daghang motorista nga moagi dihang dapita ang magbagotbot gayud.

Hinuon makapasensiya usab kita niini tungod kay adunay maayong resulta ang maong mga proyekto. Kini mao ang paghapsay ug paglambo sa systema sa inprastraktrura sa dakbayan sa Sugbo. Alang man usab kini sa mga Sugboanon. 

Apan dili gayud mawala ang suspetsa sa uban nganong mibulhot kining maong mga proyekto panahon sa eleksiyon. Wala kaha kini gituyo aron pagkahig og daghang mga boto?

Nganong wala man trabahoa kining maong mga proyekto sa niagi pang mga tuig? Tungod ba kay wala pay pundo? O gituyo gayud nga sa duol na sa eleksiyon aron ba pahumot ngadto sa katawhan.

Pangutana lamang kining ato. Apan kun aduna kini bulok sa pulitika, aw mas maayo siguro nga kada tuig ta mag-eleksiyon aron sige usab ang mga proyekto ning atong mga opisyal.

Kay sa panahon sa eleksiyon lamang diay manggawas kining mga proyekto so maayo pang kada tuig na lamang ang piniliay aron permamente’ng magbaha og mga proyekto ang dakbayan sa Sugbo.